Raporo yasohowe na The Times ivuga ko hari bamwe mu Batalibani bahoze ari ingabo z’Afghanistan batojwe n’ingabo z’u Bwongereza n’iz’Amerika ubwo ari ziri muri kiriya gihugu.

Ni raporo yanditswe nyuma yo gusuzuma amashusho aherutse kugaragaza bamwe mu Batalibani bafite imbunda Abanyamerika n’Abongereza bari barahaye ingabo za Afghanistan.

Muri iki gihe abahanga mu bya gisirikare bitegereje basanga imirwanire y’Abatalibani iteye nk’iyo ingabo z’Amerika, iz’u Bwongereza n’iyi izindi ngabo za OTAN/NATO zisanzwe zikoresha.

N’ubwo nta tangazo rivuye mu buyobozi bw’Amerika cyangwa iz’u Bwongereza rirasohoka ngo ryemeze ibi, abasesengura iby’imirwanire y’ingabo zo muri biriya bihugu bavuga ko bishoboka  ko hari bamwe mu Batalibani bahoze mu ngabo z’Afghanistan zahisemo kwihuza n’abo nyuma yo kubona ko zisumbirijwe.

Raporo ya The Times igira iti: “ Birasanzwe ko abasirikare babonye ko bagiye gutsindwa uruhenu, bahitamo kwihuza n’uwo barwanaga.”

Intsinzi idasubirwaho y’Abatalibani iherutse kugaragara ubwo bigaruriraga Intara ya Panjshir yari yarahindutse ibirindiro by’abarwanyi b’umugabo witwa Ahmad Massoud nawe watojwe n’Abanyamerika.

Massoud yashinze umutwe wa gisirikare yise  National Resistance Front of Afghanistan (NRFA).

Uyu mugabo yaraye atangarije kuri Twitter ko ‘batatsinzwe intambara kandi ko bagikomeje guhangana n’Abatalibani.’

Nyuma yo kuyigarurira, Abatalibani baraye bashyizeho Guverinoma.

Hagati aho, Umuvugizi w’Abatalibani witwa Zabihullah Mujahid aherutse kuvuga ko umusirikare wese wahoze ku ruhande rw’abo barwanaga uzashaka kuza mu gisirikare cyabo, ahawe ikaze.

Ku byerekeye ingingo y’uko Amerika n’u Bwongereza byatoje bamwe mu Batalibani b’ubu(bahawe izina rya Taliban 2.0), Umuvugizi wa Minisiteri y’ingabo z’u Bwongereza yagize ati: “ Nta kintu gifatika twaheraho twemeza ko Abatalibani batojwe n’ingabo zacu. Ibivugwa ni ibivugwa nyine!”

N’ubwo avuga atyo ariko, hari umugore w’umuhanga mu gusesengura amakuru y’ubutasi witwa Barbara Kelemen uvuga ko kuba hari bamwe mu bahoze ari ingabo z’Afghanistan bashobora kuba baragiye mu Batalibani bishoboka cyane!

Abyemeza ashingiye ku ngingo y’uko hari bamwe mu bahoze ari ingabo zAfghanistan bafitanye isano n’Abatalibani, abandi bakaba barahisemo kwihuza n’abo kubera kuramira amagara yabo mu gihe hari abandi babikoze kugira ngo bazabone imyanya mu gisirikare izabazamura mu mapeti no mu mushahara.

Uko bimeze kose ariko, Abatalibani bafite ubutegetsi kandi biyemeje kubugumana!

Mu kiganiro n’abanyamakuru cyaraye kibaye, Umuvugizi wabo Zabihullah Mujahid yavuze ko Guverinoma iri ho muri kiriya gihugu iyobowe na Mohammad Hassan Akhund akaba yungirijwe na Abdul Ghani Baradar uri mu bantu ba mbere bashinze umutwe wa Politiki w’Abatalibani.

Minisitiri w’ingabo zabo ni Mullah Yaqub n’aho Minisitiri w’ubutegetsi bw’igihugu akaba ari  Sirajuddin Haqqani.