Ambasade ya Canada mu Rwanda yatangaje ko icyo gihugu cyatanze izindi nkingo 433,300 za COVID-19, zigiye kwifashishwa mu gukingira abaturarwanda benshi bashoboka.
Ni inkingo zakiriwe nyuma y’uko mu kwezi gushize nabwo u Rwanda rwakiriye doze miliyoni 1.6 z’urukingo rwa Covid-19 rwo mu bwoko bwa Moderna, zatanzwe na Canada binyuze muri gahunda mpuzamahanga yo gufasha ibihugu kubona inkingo, COVAX.
#GoodNewsAlert!
This week 433,300 additional doses of the #COVID19 vaccine arrived in #Rwanda 🇷🇼 thanks to #Canada’s 🇨🇦 contribution.
No one is safe until everyone is safe. 💉 pic.twitter.com/3PqxQlQ6tS— Canada in Rwanda and Burundi (@CanadainRwanda) December 21, 2021
Izo zose hamwe ni inkingo zisaga miliyoni ebyiri zatanzwe na Canada, zishobora gukingira byuzuye abaturage barenga miliyoni imwe.
Ni inkingo zibonetse mu gihe leta irimo gukingira abantu benshi hagamijwe kurinda abaturage kuzahazwa na virus itera COVID-19 ikomeje kugenda yihinduranya.
Magingo aya virus irimo kwanduza abantu benshi ni Omicron.
Minisitiri w’Ubuzima Dr Ngamije Daniel kuri uyu wa Mbere yavuze ko u Rwanda rufite inkingo zihagije, ahubwo abantu basabwa “kwitabira kuza gukingirwa”.
Yagize ati “N’ahandi tutaragera ku mibare myiza nk’iya Kigali kandi inkingo bazifite, hoye kugira uwivutsa ayo mahirwe yo kugira ngo akingirwe, twese igihugu tugere kuri 70% tunarenze.”
“Nta n’impamvu yo kutarenza kuko uko inkingo zizaboneka n’iyo mibare tuzayizamura kugeza igihe n‘abana bafite hagati y’imyaka 5 kugeza kuri 11, ubu dutegereje ko inkingo z’abana zikozwe ku buryo nyine ruba ari urukingo rw’umwana, ruzapfa kugera ku isoko, leta izarushaka.”
Kugeza ubu abaturarwanda bakingiwe byuzuye ni 36%, ndetse uyu mwaka uzarangira nibura hamaze gukingirwa 40%. Hari icyizere ko umwaka utaha uzarangira hamaze gukingirwa 70%.
Abahawe urukingo rwa mbere ni miliyoni 7.3, abakingiwe byuzuye ni miliyoni 4.9 mu gihe abahawe urukingo rushimangira basaga ibihumbi 55.
Muri iki gihe hagezweho gahunda yo gutanga urukingo rwa kabiri rwa COVID-19 ku ngimbi n’abangavu bafite imyaka 12-17, yatangiye kuri uyu wa Kabiri ku bigo by’amashuri biri mu Mujyi wa Kigali.
