Ubuyobozi bwa Repubulika ya Demukarasi ya Congo bwatangaje ko noneho bwishimiye isinywa ry’imikoranire mu by’ubukungu n’u Rwanda, iyi ikaba imwe mu ngingo zikomeye zirebana no guhagarika intambara imaze igihe mu Burasirazuba bwa DRC nk’uko bikubiye mu masezerano ya Washington.
I Kinshasa bavuga ko inyandiko iherutse gusinywa n’intumwa z’ibihugu byombi ikubiyemo ibizaranga n’ibizakurikizwa mu bufatanye mu bukungu muri aka Karere, ari ingenzi mu gutuma gatekana no kukageza ku majyambere asangiwe.
Tariki 27, Kamena, 2025 nibwo inyandiko shingiro y’amasezerano yo guhagarika intambara imaze igihe ica ibintu muri DRC yasinyiwe i Washington uruhande rw’u Rwanda rwari ruhagarariwe na Minisitiri w’Ububanyi n’amahanga Amb Olivier Patrick Nduhungirehe, urwa DRC ruhagarariwe na mugenzi we Madamu Kayikwamba Wagner Thérese.
Kuyashyira mu bikorwa byabanje kugenda biguru-ntege ahanini bishingiye ku byerekeye kwambura FDLR intwaro bikozwe na DRC naho u Rwanda rugakuraho ingamba rwafashe zitwa ‘iz’ubwirinzi’.
Kigali ivuga ko idashobora gukuraho izo ngamba igihe cyose FDLR ikiri muri DRC kandi ifashwa n’ubuyobozi bw’iki gihugu.
I Kinshasa bo bavuga ko nta mbaraga uyu mutwe ufite k’uburyo bwaba ikibazo k’u Rwanda, ingingo ubuyobozi bwarwo buvuga ko idafashije kuko nta mwanzi muto cyangwa icyago gito.
Icyakora ibiganiro hagati y’ibihugu byombi muri iki gihe biyobowe na Amerika binyuze ku mujyanama wa Perezida Trump ku byerekeye Afurika witwa Massad Boulos byarakomeje mu rwego rwo gukuraho imbogamizi buri ruhande ruvuga ko ruterwa n’urundi.
Boulos aherutse kubwira Jeune Afrique ko ibiganiro by’amahoro ari ikintu kitonderwa, kikagenzwa buhoro.
Ati: “Ntabwo ibiganiro by’amahoro bihita bitanga ibisubizo nk’aho ari kwa kundi umuntu akanda buto itara rigahita ryaka.”
Umuhati wa Amerika uherutse kugera ku kintu i Kinshasa bavuga ko ari ingenzi mu gutuma ibintu bikemuka, bakemeza ko iyi nyandiko yo gutuma hagerwa k’ubufatanye mu bw’ubukungu ari iy’agaciro kanini.
Mu nyandiko ivuga kuri ubwo bufatanye mu bw’ubukungu igena ibice by’ubwo bufatanye mu by’ubukungu n’iterambere, ibi bikaba intambwe Radio Okapi ivuga ko ubuyobozi bwa DRC bwemeza ko izatuma n’amahoro agerwaho nk’uko Washington na Doha bari kubigiramo uruhare.
Leta ya Kinshasa ivuga ko ishyigikiyeho ubwo bufatanye n’ibikorwa bijyana nabwo, ikizera ko noneho ibintu bizagenda neza.
Inyandiko ikubiyemo iby’ubu bufatanye bayise ‘The Regional Economic Integration Framework (REIF).’
Nyuma yo kuyisinya, Ibiro by’Umunyamabanga wa Amerika ushinzwe ububanyi n’amahanga byasohoye itangazo rihuriweho n’impande zagize uruhare mu iyandikwa n’isinywa ry’ariya masezerano, iza ari inyandiko ishima iyo ntambwe.
