Kayitesi Alice uyobora Intara y’Amajyepfo yemeza ko mu mwaka ushize abaturage basaga 39 000 bo muri iyo Ntara isanzwe ifite Akarere ka mbere gakennye mu Rwanda bavuye mu bukene. Yemeza ko hagiye gukurikiraho ikindi cyiciro kizafasha abandi 79 000 ‘kwikura’ mu bukene.
Iby’uko ubukene buteye mu Ntara ashinzwe yabibwiye abanyamakuru kuri uyu wa Gatanu ubwo yatangazaga uko imibereho yabo ashinzwe iteye muri rusange.
Hari aho yagize ati: “Hari ingamba zafashwe kandi zishyirwa mu bikorwa k’ubufatanye n’ubuyobozi mu gufasha abaturage kwikura mu bukene zirimo kumenya iyo miryango aho iherereye n’uko ibayeho, kuyihuza n’amahirwe ahari yatuma ikora ku mafaranga, kuyifasha guhindura imyumvire hanyuma ubuyobozi bukayiba hafi binyuze mu kugaragaza gahunda yayo yo kwikura mu bukene, gufatanya n’abafatanyabikorwa n’ibindi.”
Guverineri Kayitesi Alice avuga ko mu buryo busanzwe kandi bwumvikana kuri buri wese, burya nta muntu ukura undi mu bukene.
Ahubwo, nk’uko abisobanura, uwo muntu ukennye arabanza akabyemera kandi akiyemeza kuva mu bukene hanyuma abantu bakabona aho bahera bamutera ingabo mu bitugu.
Ati: “Nta muntu ukura undi mu bukene. Umuntu yikura mu bukene ahubwo inzego z’ubuyobozi n’abafatanyabikorwa bakamuherekeza, bakamufasha.”
Imibare yatangajwe n’Ikigo cy’Igihugu cy’Ibarurishamibare (NISR) muri Mata, 2025, mu bushakashatsi bwa karindwi ku mibereho y’ingo mu Rwanda, yagaragaje ko igipimo cy’ubukene mu Rwanda hose cyagabanutse kiva kuri 39.8% mu mwaka wa 2017 kigera kuri 27.4% muwa 2024 ni ukuvuga igabanyuka rya 12,4%.
Ubukene bukabije bwo bwaragabanutse buva kuri 11.3% mu mwaka wa 2017 bugera kuri 5.4% muwa 2024, aho muri rusange Abanyarwanda miliyoni 1.5 bavuye mu bukene mu myaka irindwi ishize.
Dushingiye k’ubushakashatsi bwa karindwi ku Mibereho y’Ingo muri Rusange (EICV7) bwakozwe n’Ikigo cy’Igihugu cy’Ibarurishamibare (NISR) hagati ya 2023 na 2024, Intara y’Iburengerazuba niyo ifite abaturage benshi bakennye ugereranyije n’izindi.
Intara y’Amajyepfo niyo ikurikiraho, ari nayo ifite Akarere ka mbere gakennye mu Rwanda ari ko Nyamagabe gafite igipimo cy’ubukene cya 51.4%
