Intumwa ya Perezida Donald Trump ishinzwe Uburasirazuba bwo Hagati Steve Witkoff n’umukwe we Jared Kushner baherutse guhura mu ibanga n’abayobozi bakuru ba Hamas ngo baganire ku mbogamizi babona ko zazabangamira ishyirwa mu bikorwa ry’amasezerano y’amahoro na Israel.

Axios yanditse ko iyo nama y’ibanga yabaye kuwa Gatatu w’Icyumweru gishize, intego ikaba yari ukubizeza bidashidikanywaho ko Israel yemereye Amerika ko itazatangiza intambara ubwo imfungwa zayo zose zizaba zamaze kurekurwa.

Axios yanditse iti: “ Mu buryo bubazwe neza, intumwa za Trump zahisemo guhura imbonankubone n’abayobozi ba Hamas bazibwira ko yiyemeje ko kuri iyi nshuro amahoro aboneka kandi bazizeza ko Israel itazazisubirana ikarasa Hamas nirangiza kubona ko abantu bayo bose barekuwe.”

Icyo gihe bahuriye muri Hoteli yitwa Four Seasons iri i Cairo baraganira.

Hagati aho kandi, abashinzwe ubutasi mu Misiri na Turikiya, bari kumwe n’abayobozi ba Hamas, nabo bahuye na Witkoff na Kushner mu rugo ruri hafi y’inyanja itukura ahamaze iminsi habera ibiganiro by’amahoro hagati ya Israel na Hamas.

Hamas yari ihagarariwe na Khalil Al Hayya umwe mu bantu bari mu nama ubwo Israel yabarasagaho bari i Doha aho uyu mutwe usanzwe ufite Ibiro bikuru bya Politiki.

Inama yahuje Hamas n’intumwa za Trump imaze kurangira, zakoranye indi n’intumwa za Turikiya na Qatar, hakaba hari hari n’abahagarariye Misiri mu rwego rw’ubutasi.

Uyu muhati rero uri mu byatumye Hamas yizera ko kuri iyi nshuro Perezida Donald Trump na Israel biyemeje ko amahoro agaruka kandi ko Hamas itazatenguhwa nyuma y’aho.