Umunyamabanga mukuru w’umutwe Israel yita ko ari uw’iterabwoba Hezbollah witwa Naim Qassem yatangaje ko uyu mutwe uzihorera ku gitero giherutse guhitana umuyobozi wawo witwaga Tabatabai Israel yiciye i Beirut, Umurwa mukuru wa Lebanon.
Indege y’intambara ya Israel yagabye igitero gikomeye cyarashe missile uyu mugabo imutwikira mu modoka ye mu gace kamwe mutugize Beirut.
Minisitiri w’ingabo za Israel witwa Israel Katz yabwiye Inteko ishinga amategeko y’igihugu cye ko kiriya gitero cyateguwe kandi kigenda neza kuko byari ngombwa kwivugana umuntu wateguraga kuzagirira nabi abaturage bo mu Majyaruguru ya Israel, igice gituranye na Lebanon.
Nyuma yacyo Iran, igihugu gisanzwe gitera inkunga Hezbollah, Hamas n’aba Houthis bo muri Yemen, yatangaje ko ibyo Yeruzalemu yakoze bizayigaruka.
Naim Qassem nawe yatangaje ko Hezbollah ifite uburenganzira bwumvikana bwo kwihorera kuri kiriya gitero kandi ko izihorera mu gihe no mu buryo nyabwo kandi byateguwe neza.
Ati: “ Dufite uburenganzira bwo gusubiza abadushotoue kandi tuzabikora igihe nyacyo nikigera.”
Qassem ariko asa n’ufite ubwoba kuko yemeza ko mu mezi yashize, hari abantu bacengeye buhoro buhoro muri Hezbollah baza bashaka kuyibera abarwanyi kandi bafite undi muvuno.
Avuga ko abo barimo abaturutse mu bihugu by’Abarabu no muri Leta zunze ubumwe z’Amerika.
Icyakora ngo abo bose ntacyo bagezeho kuko bavumbuwe rugikubita.
Uyu muyobozi avuga ko nubwo ibintu bimeze gutyo, hari icyizere ko uruzinduko Papa Lewo XIV ari gukorera muri Lebanon no mu Karere ruzaturisha umwuka mubi wenda agahenge kakaboneka.
Hezbollah kandi ivuga ko nubwo ibyo bitakunda mu buryo burambye, ingabo za Lebanon zitazemera ko iba ingaruzwamuheto ya Israel kandi si ubwa mbere bibaye nk’uko abyemeza.
Amahanga ku rundi ruhande arasaba Lebanon kwambura intwaro imitwe yose ihakorera, akemeza ko uwa mbere ukwiye kuzamburwa ari Hezbollah
Umwuka w’intambara hagati ya Israel na Hezbollah uje nyuma y’umwaka umwe hasinywe amasezerano y’agahenge hagati ya Yeruzalemu na Beirut.
Israel yo ari ivuga ko itazihanganira abashobora kwihisha inyuma y’amasezerano ayo ari yo yose bakikusanya mu mayeri ngo bagirire nabi abayituye.
