Shampiyona zikundwa n’abantu benshi mu mupira w’amaguru ku mugabane w’i Burayi zageze ku musozo, ibikombe byamaze kubona ba nyirabyo.

Ubu amaso ahanzwe kuri stade Energa Gdansk muri Pologne ahazabera umukino wa nyuma wa UEFA Europa League uzahuza Villarreal na Manchester United ku wa 26 Gicurasi, no kuri Estadio do Dragao muri Portugal, ahazabera umukino wa nyuma wa UEFA Champions League uzahuza Chelsea na Manchester City, ku wa 29 Gicurasi.

Ni yo izashyira akadomo ku ngengabihe y’umupira w’amaguru muri uyu mwaka w’imikino i Burayi, ubundi abakinnyi bajye mu biruhuko, isoko ry’igura n’igurisha ry’abakinnyi rifungurwe.

Abatoranyijwe bazahita bakomereza mu gukina igikombe cy’u Burayi, UEFA EURO 2020.

Mbere y’uko ibyo bigera, hari byinshi byo guteraho ijisho. Bimwe muri byo ni ibi 10.

1. Inter Milan: Ikipe ya Inter Milan muri uyu mwaka w’imikino yegukanye igikombe cya shampiyona y’u Butaliyani, Serie A, ku nshuro ya mbere mu myaka 11 ishize. Yagiherukaga mu 2010 itozwa na Jose Mourinho. Mu nshuro zishize, Juventus ifitemo ibikombe icyenda byaherukaga, yatwaye yikurikiranya. 

2. Lille: Ikipe ya Lille yegukanye igikombe cya shampiyona yo mu Bufaransa, insinze Angers ibitego 2-1. Paris Saint-Germain yaje ku mwanya wa kabiri. Ni igikombe cya Ligue 1 cya kane itwaye mu mateka yayo, igiheruka mu 2010/2021 ubwo yari igifite ba Eden Hazard na Gervinho.

3. Atletico Madrid: Yegukanye igikombe cya Shampiyona ya Espagne, La Liga, yaherukaga mu mwaka wa 2014. Ku mwanya wa kabiri haje Real Madrd, ku wa gatatu haza FC Barcelone. Luis Suarez wirukanywe na FC Barcelona ni we wayitsindiye ibitego byinshi, 20, birimo n’icyayihesheje igikombe.

4. Bayern Munich: Iyi kipe imaze kuba ubukombe mu mupira w’amaguru mu Burayi, yegukanye igikombe cya shampiyona cya cyenda yikurikiranya. Cyahise cyuzuza umubare 7, umubare w’ibikombe umutoza Hansi Flick yatwaranye na Bayern Munich mu gihe cy’umwaka umwe n’igice yayitoje.

Gusa iyi kipe igiye gutakaza benshi mu bari bayigize uhereye ku mutoza, abakinnyi nka David Alaba, Jerome Boateng, Javi Martinez, Douglas Costa na Tiago Dantas, na Hermann Gerland na Miroslav Klose bari abatoza bungirije.

5. Man City: Mancheste City ni yo yegukanye igikombe cya shampiyona mu Bwongereza, gihita kiba icya gatatu yatwaye mu myaka ine ishize.

6. Cristiano Ronaldo: Yabaye umukinnyi wa mbere mu mateka wabashije kurangiza umwaka w’imikino ari we utsinze ibitego byinshi muri shampiyona zo mu Bwongereza, muri Espagne no muri Butaliyani.

Ronaldo w’imyaka 36 ni we wahembwe nk’uwatsinze ibitego byinshi muri uyu mwaka, 29, arusha bitanu Romelu Lukaku uwaje ku mwanya wa kabiri.

7. Robert Lewandowski: Uyu mugabo w’imyaka 32 ukomoka muri Pologne, aheruka gusoza shampiyona y’u Budage atsinze ibitego 41. Yahise akuraho agahigo k’ibitego byinshi mu mwaka umwe w’imikino mu Budage, kari gafitwe na Gerd Müller watsinze ibitego 40 mu 1971-72.

Yanasoje umwaka ari we ufite ibitego byinshi i Burayi, akurikiwe na Lionel Messi wa Barcelona ufite 30, Cristiano Ronaldo wa Juventus ufite 29, Andre Silva wa Eintracht Frankfurt ufite 28, mu gihe Erling Haaland wa Borussia Dortmund afite 27.

8. Manchester United: Iyi kipe y’i Manchetster yabaye iya gatatu mu mupira w’amaguru mu Bwongereza, irangije umwaka w’imikino idatsindiwe hanze y’ikibuga cyayo. Mu makipe yose yasuye mu mikino 19, yatsinze 12, inganya 7. Andi makipe yabikoze ni Preston (1888-89) na Arsenal inshuro ebyiri (2001-02 na 2003-04).

9. Sergio Agüero: Uyu mugabo yasezeye mu ikipe ya Manchester City ayitsindiye ibitego 184, asiga ari we ubashije gutsindira ibitego byinshi ikipe imwe, muri shampiyona y’u Bwongereza.

10. Harry Kane: Uyu musore yasoje shampiyona y’u Bwongereza ari we watsinze ibitego byinshi uyu mwaka (23 ), ndetse ni we watanze imipira myinshi yavuyemo ibitego (14 ). Ni ubwa kabiri muri iyi hampiyona utwo duhigo dutahanywe n’umuntu umwe, nyuma ya Andy Cole wakiniye Manchester United wabikoze mu 1993-94.

Aheruka gutangaza ko ashaka kuva muri Tottenham Hotspur F.C., ku buryo ashobora kuzaba umwe mu bakinnyi bazagurwa akayabo muri iyi mpeshyi.