Perezida Paul Kagame yatangaje ko ingabo z’u Burundi zimaze iminsi muri Repubulika ya Demukarasi ya Congo zigera ku bantu 20,000, akemeza ko zijya kujya yo yabanje kubiganiraho na mugenzi we Evaritse Ndayishimiye amubaza iby’aya makuru, undi arayahakana.
Kagame avuga ko amakuru y’uko izo ngabo zari bujye yo yayamenye mbere y’uko zigenda, abaza Ndayishimiye impamvu yabyo kandi hari izindi zari zihasanzwe, undi amutsembera ko ayo makuru ari ibintu abantu bafindafinda.
Mu kubibwira abari baje kwakira indahiro y’abaherutse kujya muri Guverinoma, Perezida Kagame yasubiyemo uko Ndayishimiye yamubwiye agira ati: “Oya! Uwabikubwiye yarakubeshye, nta ngabo zacu ziri aho ngaho uvuga mu Majyaruguru yanyu’. Ndamubwira nti ‘Ni byiza. Rwose ubwo wowe umuyobozi w’Igihugu cyawe ubinyibwiriye, ndabyemeye ko mutariyo’.”
Mu gihe gito cyakurikiyeho, ibyo Ndayishimiye yabwiye Perezida Kagame ko bamubeshye, yaje gusanga ahubwo ari Ndayashimiye wamubeshye kuko hari abasirikare b’u Burundi benshi boherejwe muri DRC ahitwa Kindu, Minembwe n’ahandi.
Ngo u Burundi bwaje kugira abasirikare 20,000 muri Congo.
Ikibabaje kurushaho, nk’uko abivuga, ni uko abo basirikare batari bagiye gushakira abatuye aho hantu amahoro, ahubwo kwari ukubajujubya no kubica urusorongo.
Abibasiwe ni abaturage bavuga Ikinyarwanda bo mu bwoko bw’Abatutsi bazizwa ko hari icyo baba bapfana n’Abanyarwanda.
Perezida Paul Kagame asanga kugira ngo ibibera muri DRC bikemurwe, ari ngombwa ko ibikubiye mu masezerano u Rwanda ruherutse gusinyana na DRC k’ubuhuza bwa Amerika bigomba kubahirizwa na buri ruhande bireba.
Avuga ko kuba amahanga yegeka ibibera muri DRC byose k’u Rwanda akirengagiza uruhare rw’u Burundi n’abandi barimo na DRC, ari ukubogama gukomeye.
Ibi kandi ngo ntacyo bikemura ahubwo bituma hataboneka umuti urambye.
Kagame yongeye kwibutsa amahanga ko ikibazo cy’u Rwanda gikomeye ku mutekano warwo ari FDLR kandi ko ruzakomeza kwirinda uko byagenda kose.
Iby’ingabo z’u Burundi muri DRC, bigarutsweho nyuma y’uko AFC/M23 izirukaniye muri Uvira, umujyi wa Kivu y’Epfo uhana imbibi n’ u Burundi.
Ubwo Kagame yasinyanaga na Tshisekedi amasezerano y’amahoro n’ubukungu bakayasinyira muri Amerika, na Ndayishimiye yari ahari.
Yahatumiwe kuko afite ingabo muri DRC kandi akaba umuturanyi wa Kigali na Kinshasa.
