Mu Biro bye, Perezida Paul Kagame yaraye ahakiririye abayobozi b’Ikigo nyafurika cy’imiti, Africa Medicine Agency, AMA, gisanzwe gifite ikicaro mu Karere ka Nyarugenge, Kigali.
Abo yakiriye ni Ambasaderi Amma Twum-Amoah akaba Komiseri w’Afurika yunze ubumwe ushinzwe ubuzima, ibikorwa by’ubutabazi n’iterambere ry’imibereho myiza (HHS) na Dr. Delese Mimi Darko, Umuyobozi Mukuru wa mbere wa kiriya kigo.
Niwe wa mbere kuko kitaruzuza umwaka gitangiye gukora, kikaba cyarafunguwe mu Ugushyingo, 2024, Dr. Darko we ni inzobere yo muri Ghana ihugukiwe ibijyanye n’igenzura ry’imiti.
Ubwo cyafungurwaga, Leta y’u Rwanda yari ihagarariwe na Minisitiri w’ubuzima Dr. Sabin Nsanzimana.
Kagame yaganirije abashyitsi be ku mikorere ya kiriya kigo n’ibyakorwa ngo cyongererwe ubushobozi bityo gifashe inzego z’ubuzima hirya no hino muri Afurika.
Afurika niwo mugabane wibasirwa cyane n’indwara n’ibyorezo kandi utagira uburyo bwo kubikumira cyangwa kubirwanya binyuze mu makuru, ubumenyi ku baturage, ikagira abaganga bake n’imiti itikorera ubwayo, ikayigura hanze biyihenze kandi ugasanga hari ubwo itujuje ubuziranenge.
Urugero, ubwo COVID-19 yadukaga kuri uyu mugabane mu ntangiriro z’umwaka wa 2020 byagaragariye isi ko Afurika ikeneye kugira uburyo bwayo bwo gukora no kubika neza imiti n’inkingo.
Niho havukiye igitekerezo cyashyigikiwe na Perezida Kagame n’abandi bayobozi barimo uw’Ishami ry’Umuryango w’Abibumbye ryita ku buzima, OMS/WHO, Dr. Tedros Adhanom Ghebreyesus cyo gufasha Afurika kubaka inganda zikora imiti n’inkingo no kubona uko byombi byabungwabungwa.
Muri uwo mujyo, niho u Rwanda, Senegal na Ghana byatangiye kubaka inganda zikora inkingo harimo n’urwitwa BioNTech rwubatswe mu Rwanda ku bufatanye n’Ubudage.
Ikigo Africa Medicine Agency, AMA, gishinzwe guhuza uburyo bwo kugenzura imiti muri Afurika.
Ku byerekeye ibyo Perezida Kagame yaganiriye n’abo bayobozi, harimo inshingano za AMA, bibanda k’ukorohereza Abanyafurika bose kubona imiti ifite ireme, yizewe kandi ikora neza binyuze mu kunoza no guhuza inzego zibishinzwe.
Hagati aho, Perezida Kagame niwe uyobora gahunda yo guteza imbere ubuvuzi no kubushakira inkunga.
Yemera ko kugira inzego z’ubuzima zikomeye kandi zishobora kwigira bisaba imari ituruka imbere mu bihugu n’ubushake bwa politiki bushyigikira ibigo nka AMA.
Kugira ngo ikigo AMA kigere ku byo gishinzwe, kigomba kurenga urwego rw’amategeko n’imiterere by’ibanze bikiranga, kigatangira gukorana neza n’Inzego z’ibihugu zishinzwe kugenzura imiti n’Amashyirahamwe y’ubukungu y’ibihugu by’Akarere runaka mu turere twa Afurika (RECs).
