Hakainde Hichilema wo mu ishyaka ritavuga rumwe n’ubutegetsi yatorewe kuyobora Zambia mu myaka itanu iri imbere, atsinze Edgar Lungu wari ku butegetsi guhera mu 2015.
Mu majwi yatangajwe mu rukerera rwo kuri uyu wa Mbere, Hichilema w’imyaka 59 ni we watangajwe nk’uwatsinze amatora n’amajwi miliyoni 2.8, arusha Lungu amajwi arenga miliyoni imwe.
Perezida wa Komisiyo y’amatora Esau Chulu yabwiye itangazamakuru ati “Ntangaje ku mugaragaro ko Hakainde Hichilema ari we perezida watowe wa Repubulika ya Zambia, kuri uyu wa 16 Kanama.”
Bwari ubwa gatanu Hichilema ahatana mu matora ya perezida, mu 2006, 2008, 2011, 2015 na 2016.
Mu 2016 yatsinzwe Lungu amurusha amajwi 100 000 gusa.
Hichilema akomoka mu ishyaka United Party for National Development, UPND.
Perezida Lungu aheruka gutangaza ko amatora atabaye mu mucyo, ndetse ko atemera ibizavamo.
Hichilema afite akazi gakomeye kamutegereje ko kuzahura ubukungu bwa Zambia, nyuma y’uko iheruka kuba igihugu cya mbere muri Afurika cyananiwe kwishyura amadeni yacyo guhera mu mwaka ushize, bitewe n’ingaruka z’icyorezo cya COVID-19.
Ni ubwa gatatu Zambia igiye guhererekanya ubutegetsi binyuze muri demokarasi, guhera kuri Kenneth Kaunda wayoboye icyo gihugu kugeza mu 1991.
