Baba abaturage baba n’abayobozi babo, bose bemeza ko hari imbwa ziba mu gasozi bita ibihomora ziruma abantu n’amatungo, bakemeza ko hari zimwe murii zo zimara kurya abantu biganjemo abana, zigahungira muri Pariki ya Gishwati-Mukura.

Abaturage bamwe bavuga ko bishoboka ko izo mbwa ziba zirwaye ibisazi kandi urumwe n’imbwa ibirwaye iyo atabikingiwe biramuhitana.

Mu gihe batakambira itangazamakuru, bungamo ko babibwiye ubuyobozi bw’Akarere n’ububegereye aho batuye bukabirenza ingohe.

Mukandoli Béatha wo mu Murenge wa Ruhango yabwiye bagenzi bacu ba Imvaho Nshya ati: “Hari imbwa ebyiri z’agasozi zaje mu rugo zirya ihene zanjye. Twabimenyesheje ubuyobozi bw’Akagari, ariko nta gikorwa gifatika cyo kuzica cyakozwe. Ubu dutekereza ko zishobora no kwinjira muri Pariki kuko zica udukwavu n’utundi tunyamaswa nk’inkima n’izindi.”

Undi wo muri uyu murenge witwa Habarurema Jean Claude avuga ko imbwa z’inzererezi zigeze no kuruma umwana w’imyaka itanu mu Kagari kabo kandi ngo nyuma y’imyaka runaka ishize, ntacyakozwe ngo bihagarare.

Ati: “Bidutera ubwoba kuko ziza mu gicuku no k’umugoroba mu kabwibwi zikarya amatungo ndetse n’uwo zihuye nawe. Zatuma abana batinya kujya kwiga kandi iyo amanywa akambye zigira muri Pariki ya Gishwati.”

Zageze no muri Pariki

Umuyobozi wa Pariki ya Gishwati–Mukura, Anaclet Budahera avuga ko ikibazo cy’imbwa z’agasozi cyiyongereye cyane mu bihe bya vuba.

Ni ikibazo avuga ko kizagira ingaruka ku bukerarugendo buhakorerwa kuko izo mbwa z’agasozi zishobora kuzakura umutima abayisura.

Ati: “Imbwa nyinshi ziva mu baturage ziza muri Pariki zishaka ibyo zirya. Iyo zigeze aha zirya utunyamaswa duto. Ibi bihungabanya cyane uburyo twubakiraho ubusugire bwa Pariki.”

Asaba abaturage bafite imbwa kuzibungabunga, bakazigaburira neza bakazifata neza kugira ngo zitazacika zikajya kwibasira inyamaswa zo muri Pariki.

Umuyobozi wungirije w’Akarere ka Rutsiro ushinzwe iterambere ry’ubukungu, Uwizeyimana Emmanuel, yemeza ko ubuyobozi bw’Akarere bwamaze kumenya ikibazo cy’imbwa z’agasozi.

Avuga ko bashaka kuzakorana n’izindi nzego zirimo n’iz’umutekano kugira ngo iki kibazo gikemurwe.

Uwizeyimana avuga ko izo mbwa zizerera ziva mu murenge umwe zijya mu wundi kandi aho ziciye ntizibura kugira ibyo zisagarira.

Ati: “Zifata amatungo kandi zigateza impanuka. Turi gukorana n’inzego z’umutekano n’abashinzwe ubuzima bw’amatungo kugira ngo dushake uburyo izo mbwa zategwa zikicwa, cyane cyane ba nyirazo baba batazwi.”

Yasabye kandi abaturage kwita ku mbwa zabo bakazigaburira bakanazikingiza ibisazi bw’imbwa, indwara abahanga bita rage.

Ikibazo cy’imbwa cyangwa izindi nyamaswa zononera abaturiye Pariki ya Gishwati-Mukura si icya none.

Mu kwezi nk’uku,( Ugushyingo), 2021, iki kinyamakuru uri gusoma cyanditse ko abaturage bo mu Turere twa Rutsiro, Ngororero, Nyabihu na Rubavu batakaga ko hari igikoko gituruka muri Pariki ya Gishwati-Mukura kica inyana zabo.

Ntibyatinze iki kibazo kiraguka kugeza ubwo Perezida Kagame yakigarukagaho mu ijambo yavugiye mu Nteko ishinga amategeko, avuga ko hari amakuru yumva y’ibikoko byamaze inka z’abaturage ariko hakaba nta muyobozi uragira icyo abikoraho mu buryo burambye.

Nyuma y’ijambo yavuze, inzego zakoze uko zishoboye ikibazo gihabwa umurongo, icyakora ubu kirasa n’icyagarutse.

Taarifa Rwanda iracyagerageza kuvugana n’ubuyobozi bwa RDB kucyo bateganya gukora ngo izo mbwa zikumirwe kwinjira muri Pariki ya Gishwati-Mukura, iyi ikaba pariki ikiri nshya, ikeneye kubungwabungwa cyane.