Guverinoma ya Tanzania yasabye abaturage kuguma mu ngo zabo kuri uyu wa Kabiri tariki 09, Ukuboza, umunsi iki gihugu kizihirizaho ubwigenge, icyo gihe hari muri 1961 habura umwaka umwe ngo n’u Rwanda rwigenge.

Polisi ya Tanzania yahaye abaturage umuburo ko umuntu uri bwigaragambye ari bube akoze ibitemewe n’amategeko bityo ko ari bufatwe akazashyikirizwa ubutabera.

Ubwoba buri muri Tanzania muri iki gihe, bwakuruwe n’ibyakurikiye amatora y’Umukuru w’igihugu yabaye mu Ukwakira, 2025 yatsinzwe na Samia Suluhu Hassan ariko abatavuga rumwe nawe barabyamagana.

Byabakozeho kuko hari benshi bishwe barashwe, inzego zimwe zikavuga ko bakabakaba abantu 1000 mu gihe Leta yo ivuga ko koko bapfuye ariko ntivuge umubare.

Uretse abapfuye, hari n’abandi bafunzwe n’ubwo Perezida Suluhu yategetse ko bamwe muri bo biganjemo urubyiruko barekurwa.

Polisi ya Tanzania kuri iyi nshuro yavuze ko kwigaragambya biri bufatwe nko kubangamira umudendezo n’ubukungu bw’igihugu bityo ko ubikora wese ari bukurikiranwe.

Africanews yanditse ko, ku rundi ruhande, ubuyobozi bw’Ishami ry’Umuryango w’Abibumbye ryita k’uburenganzira bwa muntu buherutse gusaba Leta ya Tanzania kuzirikana kubungabunga uburenganzira bwa muntu kuko abaturage bemerewe ‘kwigarambya mu mahoro’’

Andi makuru avuga ko Leta zunze ubumwe za Amerika ziri gusuzuma uko umubano wazo na Tanzania uteye, zikabikora kuko zihangayikishijwe n’uburenganzira bw’abayituye bushingiye ku myemerere n’imyizerere, ubushingiye k’ukuvuga ‘akakuri ku mutima’ ndetse Amerika isanga hari bimwe mu bigize ishoramari ryayo bibangamirwa n’ubutegetsi bwa Tanzania.

Ubwo Minisitiri w’Intebe wa Tanzania  Mwigulu Nchemba  yatangazaga ko ibyo kwizihiza umunsi w’ubwigenge bitazaba, yavuze ko ingengo y’imari byari byarategarijwe izakoreshwa mu gusana ibyangijwe n’abigarambije bamagana ibyavuye mu matora.

Samia Hassan Suluhu yayatsinze ku ijanisha rya 98% ariko abatavuga rumwe nawe bavuga ko ibyayavuyemo ari ibintu byahimbwe, ko bidahuje n’ukuri.

Banabishingira y’uko abari buhangane nawe bose bakumiriwe kwiyamamaza barimo ukomeye witwa Tundu Lissu uyobora ishyaka CHADEMA( Chama cha Demokrasia na Maendeleo).

Undi wigijweyo ni Luhaga Mpina w’ishyaka ry’urubyiruko bita ACT-Wazalendo wabwiwe ko atemerewe gutanga impapuro zo kwiyamamaza.