Ubushakashatsi bushya bwerekanye ko abantu barwaye COVID-19 bakayikira ariko ntibikingize, bafite ibyago byo kongera kuyandura bikubye inshuro eshanu iby’abakingiwe byuzuye, batigeze bayirwara.
Ni ubushakashatsi bwanzura ko nubwo gukira COVID-19 hari ubwirinzi bisiga mu mubiri w’umuntu, ari ngombwa no guhabwa urukingo.
Bwakozwe n’Ikigo cya Leta zunze Ubumwe za Amerika gishinzwe kurwanya ibyorezo (CDC), kigereranya ibipimo by’abantu bajyanwe mu bitaro 187 byo muri Leta icyenda bafite ibimenyetso bisa n’ibya COVID-19, hagati ya Mutarama – Nzeri 2021.
Ni amezi yakwirakwiragamo virusi zihinduranyije za Alpha na Delta.
Muri ubwo bushakashatsi hagereranyijwe ibyiciro bibiri: Icya mbere ni icy’abantu batakingiwe kandi bigeze gusangwamo SARS-CoV-2 (virus itera COVID-19) mu minsi hagati ya 90–179; icya kabiri kikaba icy’abantu bakingiwe byuzuye hakoreshejwe inkingo zo mu bwoko bwa mRNA, za Pfizer-BioNTech cyangwa Moderna hagati y’iriya minsi.
Icyiciro cya kabiri kandi cyarimo abantu bigeze kwipimisha SARS-CoV-2 nyuma ya Gashyantare 2020, muri bya bitaro byakorewemo ubushakashatsi.
Ntabwo abantu bakingiwe hakoreshejwe urukingo rwa Johnson & Johnson bashyizwe muri ubu bushakashatsi kubera imibare idahagije.
Mu bushakashatsi hari hagambiriwe kugereranya ibipimo by’ubwirinzi umuntu aheshwa no kuba yarigeze kwandura SARS-CoV-2 akaza kuyikira, n’ubwirinzi bushingiye ku kuba umuntu yarakingiwe COVID-19 byuzuye.
CDC ivuga ko hagati ya tariki 1 Mutarama – 2 Nzeri 2021, abantu 201,269 bashyizwe mu bitaro bagaragaza ibimenyetso bisa nk’ibya COVID-19.
Muri bo, abarwayi 139,655 (69.4%) bajyanywe mu bitaro inkingo za COVID-19 zaramaze kugezwa ku bantu bo mu kigero cyabo, mu duce batuyemo.
Muri icyo gihe hapimwe SARS-CoV-2 abarwayi 94,264 (67.5%). Muri abo, 7,348 (7.8%) bari baripimishije mu minsi irenga 14 mbere yo gushyirwa mu bitaro, bujuje ibisabwa ngo bashyirwe muri bya byiciro byombi.
Abantu 1,020 bisanze mu cy’abigeze gusangwamo SARS-CoV-2 batakingiwe, 6,328 bajya mu cy’abakingiwe byuzuye kandi batigeze basangwamo buriya burwayi mbere.
Ibizamini bya laboratwari byaje kwemeza ko ubwandu bwa SARS-CoV-2 bwabonetse mu bantu 324 (5.1%) muri ba bandi 6,328 bakingiwe byuzuye no mu bantu 89 mu 1,020 (8.7%) batakingiwe ariko bigeze kwandura SARS-CoV-2.
Ubushakashatsi bukomeza buti “Mu bantu bashyizwe mu bitaro bafite ibimenyetso bisa nk’ibya COVID-19 bigeze kwandura cyangwa bakingiwe mu minsi 90–179 ishize, ibipimo bya laboratwari byemeje ko ubwandu bwa COVID-19 bwari hejuru mu bantu bigeze kwandura, batakingiwe, kurusha mu bakingiwe byuzuye.”
Iyo mibare igaragaza ko ibyago mu batarakingiwe byari hejuru inshuro 5.49 ugereranyije n’abakingiwe byuzuye.
Bitekerezwa ko imibare yakozwe ishobora kugira ukwibeshya guto, gushingiye ku muntu wenda wigeze kwandura SARS-CoV-2 ntiyipimishe, bityo agashyirwa mu batarigeze bandura kandi atari ko bimeze.
Abashakashatsi banzura ko ubwirinzi bushingiye ku rukingo ari bwo bukomeye kurusha ubushingiye ku kuba umuntu yarigeze kwandura SARS-CoV-2 akayikira.
Bati “Abantu bose bari mu byiciro byemerewe bakwiye kwikingiza COVID-19 vuba bishoboka, harimo n’abantu batarakingirwa bigeze kwandura SARS-CoV-2.”
Ubu bushakashatsi ariko bwarebye ku nkingo n’ubwandu byabonetse mu gihe kitarenga amezi atandatu, mu gihe ubushakashatsi bugenda bwerekana ko ubushobozi bw’urukingo bugabanyuka uko iminsi ishira.
Ubundi bushakashatsi bwerekanye ko umuntu wigeze kurwara iyi ndwara akanikingiza, bimuha ubwirinzi buri hejuru kurushaho.
