Faustin-Archange Touadéra niwe watangajwe na Komisiyo y’igihugu y’amatora muri Repubulika ya Centrafrique ko ari we watsindiye kuba Perezida wa Repubulika.
Yatsinze ku majwi76.15%, nk’uko byatangajwe by’agateganyo na Komisiyo ishinzwe amatora muri iki gihugu (ANE), nyuma y’ibarura ry’ibyavuye muri ayo matora.
Yari asanzwe ari we uyobora iki gihugu kigeze kumara imyaka myinshi mu mvururu zishingiye kuri politiki, amadini n’amoko.
Amatora yabaye Tariki 28, Ukuboza, 2025 niyo yatsinzemo abo bari bahanganye barimo uwahoze ari Minisitiri w’Intebe, Anicet-Georges Dologuélé wagize amajwi 14.66% na Hénri-Marie Dondra wagize amajwi 3.19% nawe akaba yarabaye Minisitiri w’Intebe w’iki gihugu.
Bombi ntibemera ibyatangajwe na Komisiyo y’amatora, bakavuga ko habayeho kwiba amajwi.
Urukiko rushinzwe kurengera Itegeko Nshinga muri Centrafrique ruzatangaza ibyavuye muri aya matora ku buryo bwa burundu bitarenze Tariki 20, Mutarama, 2026.
Mu mwaka wa 2016, nibwo Archange Touadéra w’imyaka 68 yatorewe bwa mbere kuyobora iki gihugu.
Mbere yabaye Minisitiri w’Intebe w’iki gihugu kuva muwa 2008 kugeza mu mwaka wa 2013.
Mu mwaka wa 2023, muri Centrafrique habaye amatora yo kuvugurura Itegeko Nshinga ry’iki gihugu ku bijyanye na manda y’Umukuru w’Igihugu.
Manda yavanywe ku myaka itanu ishyirwa ku myaka irindwi, bikaba biri mu byatumye Archange Touadéra yemererwa kwiyamariza manda ya gatatu, ari nayo yatorewe kuyoboramo iki gihugu, mu matora yitabiriwe ku kigero cya 52.42%.
Archange Touadéra yagiye k’ubutegetsi asimbuye Cathérine Samba Panza wari uyoboye Leta y’inzibacyuho kuva Tariki 23, Mutarama, 2014.
