Mu Mudugudu wa Rukari, Akagari ka Rwesero, Umurenge wa Busasamana muri Nyanza haravugwa ifungwa rya nyiri akabari wafashwe n’inzego z’umutekano ubwo yajyaga kuzibwira ko yasanze umurambo w’umukecuru mu bwiherero bw’akabari ke.

Ababonye uwo mukecuru bwa mbere bavuga ko basanze yaguye muri uwo mwobo acuramye ‘bigakekwa’ ko yajugunywemo.

Yari ari mu kigero cy’imyaka 66, bikavugwa ko yahuye n’ako kaga ubwo yari agiye yo kwica akanyota.

Umukecuru bikekwa ko yari yagiye kunywera mu kabari, yasanzwe mu bwiherero bwako yapfuye umurambo we ucuramye bikekwa ko yishwe.

Ibye kandi byamenyekanye ahagana saa sita z’ijoro ryakeye nk’uko umwe mu babibonye yabibwiye itangazamakuru.

Ubuyobozi bw’aho byabereye bwabwiye umunyamakuru wa UMUSEKE ukorera muri Busasamana ko nyiri akabari yafunzwe ubwo yajyaga kubibwira inzego zishinzwe umutekano w’Abanyarwanda.

Umunyamabanga Nshingwabikorwa w’Umurenge wa Busasamana, Bizimana Egide yavuze ko uwo mukecuru witwaga Mukarwego Hosiana.

Ati: “Inzego z’umutekano n’ubuyobozi zahageze dusanga ari umukecuru, umurambo we ucuritse mu bwiherero.”

Umuvugizi wa Polisi mu Ntara y’Amajyepfo, CIP Hassan Kamanzi we yabwiye Taarifa Rwanda ko hari abantu batanu bafashwe barimo abasangiye n’uwo mukecuru, bakaba bakekwaho uruhare runaka mu rupfu rwe.

Mu gihe inzego ziri guperereza ngo zigire byinshi zibimenyaho, umurambo wavanwe muri ubwo bwiherero ujyanwa ku bitaro bya Nyanza.

CIP Kamanzi asaba abaturage kureka urugomo cyangwa ibindi byaha, akabasaba kandi gukomeza gutanga amakuru akenewe ngo abagizi ba nabi bafatwe.

Yafashe mu mugongo abo mu muryango wwa nyakwigendera, abizeza ko iperereza rizakomeza abagize uruhare muri ibyo byose bakazagezwa mu butabera.