Inkubi abahanga mu bumenyi bw’isi bise Kalmaegi ikomereje urugendo muri Vietnam nyuma yo gusiga Philippines mu marira menshi kubera abantu 114 yishe isiga ihombeje benshi.
Iyi nkubi yafashe inzu, iminara, amapoto n’ibindi bikorwaremezo byo muri imwe mu mijyi ya Philippines irabyararika ku buryo hari aho icyahoze ari umujyi ubu cyabaye itongo nk’uko BBC yabyanditse.
Ubu ikomereje muri Vietnam aho byitezwe ko izagera ifite umuvuduko urushijeho kuba mwinshi ndetse ubu ubuyobozi bwategetse ko ibibuga bitandatu by’indege biba bihagaze gukora.
Muri Vietnam ihageze isanga n’ubundi igihugu kiri mu bibazo cyatewe n’imvura ihamaze iminsi yatumye havuka imyuzure ku buryo amazi yazamutsemo metero umunani.
Minisitiri w’Intebe wa Vietnam wungirije witwa Tran Hong Ha yasabye abayobozi gufata ingamba zihuse mu kureba uko abantu bahungishwa iyo kabutindi itaragera mu gihugu.
Imvura ihamaze iminsi yatumye inzuzi zuzura ziteza imyuzure n’inkangu zikomeye ndetse hamwe mu hantu hasurwaga naba mukerarugendo hakomeye hitwa Hue na Hoi An hangiritse kubera iyo myuzure.
Aho ni hamwe mu hantu hashyizwe mu bigize umurage w’isi bikozwe na UNESCO.
Muri iki gihe kandi Vietnam imaze gupfusha abantu 35 bazize icyo cyiza, mu gihe inkangu 150 zimaze kuriduka hirya no hino mu gihugu, inzu 1000 zirasenyuka.
