K’ubutumire bwa Perezida wa Repubulika ya Centrafrique, Prof. Faustin Archange Touadéra, umugaba w’ingabo zirwanira k’ubutaka mu ngabo z’u Rwanda Major General Vincent Nyakarundi yitabiriwe igikorwa cyo kwinjiza mu gisirikare cya Centrafrique abantu 545.
Byabaye kuri uyu wa Gatandatu Tariki 29, Ugushyingo, 2025, bibera mu kigo cya gisirikare cya Camp Kassai i Bangui.
Wabaye umwanya wo guha impamyabumenyi ba ofisiye 121 bo mu ngabo z’iki gihugu bari bamaze amezi atandatu batozwa na RDF.
Ubusanzwe ingabo za Centrafrique zitwa Forces Armées Centrafricaines, FACA.
Umugaba Mukuru wazo witwa General Victor Yacoub yashimye ubufatanye ingabo z’u Rwanda zifitanye n’iz’igihugu cye mu bijyanye no guhugura abasirikare, avuga ko kugeza ubu RDF yamaze guhugura abasirikare 2,409 binjiye bushya n’aba ofisiye 300.
Yashimye umurava n’ikinyabupfura abatojwe bagaragaje mu mezi atandatu bamaze bahugurwa.
Major General Nyakarundi yabwiye abo basirikare ko bakwiye gukomeza kuba urugero rwiza kubo bayobora, bagatunganya akazi kabo, bakarangwa n’ubunyamwuga n’ikinyabupfura mu gukorera igihugu cyabo.
Nyakarundi yashimye ubufasha Perezida Kagame na Perezida Touadéra batanze kugeza ubwo abo basirikare barangije ibyo bigaga n’ubwo batanze na mbere y’aho.
Nyuma y’ibyo byose, hakurikiyeho imyiyereko ya gisirikare, abatojwe babyerekana binyuze mu kwerekana ko ari intarumikwa.
Ibi bibaye nyuma y’uko Perezida Touadéra asuye u Rwanda akaganira na mugenzi we Paul Kagame ku byakorwa ngo Kigali na Bangui bakomereze aho bagejeje mu mubano.
