Ubuyobozi bw’Ishyirahamwe ry’Umupira w’Amaguru mu Burayi, UEFA, bwemeje ko tombola y’uburyo amakipe azahura mu mikino yo gukuranamo muri Champions League igomba gusubirwamo, kubera amakosa yagaragaye.
Uburyo amakipe azahura bwahise buhinduka, uretse Chelsea yongeye gutomborwa na Lille yo mu Bufaransa.
Gusubiramo tombola byatumye amakipe 16 asigaye muri UEFA Champions League azahura mu buryo bukurikira: Sporting Lisbon vs Manchester City, Paris Saint-Germain vs Real Madrid, RB Salzburg vs Bayern Munich, Inter Milan vs Liverpool, Chelsea vs Lille, Villarreal vs Juventus, Benfica vs Ajax na Atletico Madrid vs Manchester United.
Ikipe itangira ari nayo yatomboye, izakira umukino ubanza.
Nyuma ya tombola, biteganywa ko imikino ibanza izaba ku wa 14 na 15 indi ibe hagati ya tariki 22 na 23 Gashyantare 2022. Ni mu gihe imikino yo kwishyura izaba ku matariki ya 8-9 Werurwe n’amatariki ya 15-16 Werurwe.
Kuki tombola yasubiwemo?
Tombola yabereye i Nyon mu Busuwisi kuri uyu wa Mbere saa saba yari yemeje uburyo amakipe azahura: Benfica vs Real Madrid; Villarreal vs Manchester City; Atletico Madrid vs Bayern Munich; Salzburg vs Liverpool; Inter Milan vs Ajax; Sporting Lisbon vs Juventus; Chelsea vs Lille na PSG vs Manchester United.
Amakipe yabaye aya mbere mu matsinda yari yashyizwe mu gatebo ka mbere, ni ukuvuga Manchester City, Liverpool, Ajax, Real Madrid, Bayern Munich, Manchester United, Juventus na Lille.
Yagendaga atomborwa n’amakipe yabaye aya kabiri mu matsinda ari yo Juventus, Salzburg, Chelsea, Villarreal, Benfica, Inter Milan, Sporting CP, Atletico Madrid na Paris Saint-Germain, yari yashyizwe mu gatebo ka kabiri.
Nubwo ari uko byari bimeze ariko, irengayobora ryavugaga ko nta kipe ishobora gutombola iyo bituruka mu gihugu kimwe cyangwa iyo byari kumwe mu itsinda.
Ibyo byatumaga niba hatangajwe ikipe yabaye iya kabiri igiye gutombola, mu gatebo karimo amakipe yabaye aya mbere hagomba kuzamo gusa ayujuje ibisabwa n’amategeko.
Nyamara ubwo hasomwaga Villareal F.C yo muri Espagne, Andriy Arshavin wakiniye Arsenal F.C wari urimo gufasha muri tombola yazamuye agapapuro mu gasanduku yahawe, haza Manchester United.
Iyo kipe ntiyagombaga kuba irimo kubera ko yarangije ari iya mbere mu itsinda F yari ihuriyemo na Villareal, Young Boys na Atalanta.
Umuyobozi muri UEFA, Giorgio Marchetti, yahise avuga ko hagendewe ku mategeko ayo makipe adashobora guhura kuri iki cyiciro.
Arshavin yahise azamura akandi gapapuro, noneho haza Manchester City byemezwa ko ari yo izakina na Villareal.
Byaje kugaragara ko mu gatebo harimo amazina arindwi aho kuba atanu, harengaho Manchester United na Real Madrid na yo muri Espagne itashoboraga guhura na Villareal.
Ku yindi nshuro ubwo Atletico Madrid yo muri Espagne yatombolaga, Manchester United ntabwo yari mu gatebo k’amakipe bishobora guhura kandi byemewe n’amategeko y’irushanwa.
Byarangiye Atletico Madrid itomboye Bayern Munich.
Muri ya makosa, Liverpool yari iri mu gatebo mu gihe itashoboraga guhura na Atletico Madrid kuko byari kumwe mu matsinda, nubwo kubw’amahire itayitomboye.
UEFA yaje gutangaza ko tombola igomba gusubirwamo.
Yagize iti “Nyuma y’ikibazo tekiniki cy’ikoranabuhanga ryatanzwe n’ikindi kigo ribwira abayobozi amakipe ashobora guhura, habaye ikosa muri tombola y’uburyo amakipe 16 asigaye mu irushanwa azahura.”
“Kubw’iyo mpamvu, tombola iteshewe agaciro ndetse igomba gusubirwamo saa 1500 CET.” Ni ukuvuga saa 16:00 ku isaha y’i Kigali.
Umukino wa nyuma wa UEFA Champions League uzaba ku wa 28 Gicurasi 2022, kuri Gazprom Arena mu mujyi wa Saint Petersburg mu Burusiya.
Igikombe giheruka cyatwawe na Chelsea yo mu Bwongereza.
As a result of this, the draw has been declared void and will be entirely redone at 15:00 CET.
— UEFA Champions League (@ChampionsLeague) December 13, 2021
