Menu
Indimi
Advert

Mu mahanga

Abakekwaho Kwica Thomas Sankara Bagiye Kuburanishwa Nyuma y’Imyaka 34

Yanditswe kuwa

Urukiko rwa Gisirikare rwa Ouagadougou muri Burkina Faso rwatangaje ko rugiye kuburanisha urubanza rw’abakekwaho kwica Thomas Sankara wayoboye icyo gihugu, ruzatangira ku wa 11 Ukwakira 2021.

Sankara yishwe ku wa 15 Ukwakira 1987, mu ihirikwa ry’ubutegetsi ryakozwe na mucuti we Capitaine Blaise Compaoré.

Compaoré waje kuyobora Burkina Faso kuva mu 1987 kugeza mu 2014, ari kumwe n’abandi bantu benshi baregwa muri iyo dosiye.

Uru rubanza rugiye kuba nyuma y’imyaka 34 Sankara yishwe.

Umwe mu bavoka b’imiryango y’abishwe muri kiriya gihe, Me Guy Hervé Kam, yavuze ko itangazwa ry’uru rubanza atari intsinzi gusa kuri iyo miryango, ahubwo ni n’igihe cyo kumenya ukuri ku byabaye.

Ati “Hashize igihe kinini hategerejwe ko hajya ahabona, mu buryo bweruye kandi imbere ya buri wese, uruhare rw’umuntu ku giti cye cyangwa ruhuriweho rwagejeje ku marorerwa yo ku wa 15 Ukwakira 1987.” Hari mu kiganiro na RFI.

Muri rusange abantu 14 bagomba kugira ibyo babazwa muri urwo rubanza.

Harimo Blaise Compaoré wahungiye muri Côte d’Ivoire, washyiriweho impapuro zisaba ko atabwa muri yombi.

Aregwa ibyaha byo kubangamira umutekano w’igihugu, ubufatanyacyaha mu bwicanyi no guhisha imirambo.

Ni umwe mu batarafatwa hamwe na Hyacinthe Kafando wari ushinzwe umutekano we.

Compaoré yayoboye Burkina Faso, atsinda amatora mu myaka ya 1991, 1998, 2005, na 2010.

Ubwo yageragezaga guhindura Itegeko Nshinga kugira ngo akomeze kuyobora igihugu nyuma y’imyaka 27 yari ayoboye, yateje imyigaragambyo mu 2014.

Ku wa 31 Ukwakira 2014 Compaoré yareguye, ahita anahungira muri Cote d’Ivoire.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement