Leta Zunze Ubumwe za Amerika yatangiye kohereza muri Afurika inkingo za COVID-19 zisaga miliyoni 15, nk’igice cy’inkingo miliyoni 80 icyo gihugu giheruka kwemera gusaranganya n’amahanga bitarenze Kamena 2021.
Mu itangazo ubutegetsi bwa Perezida Joe Biden bwasohoye kuri uyu wa Mbere, bwavuze ko mu ntangiro z’uku kwezi hatangajwe abagenewe miliyoni 25 za mbere zanatangiye koherezwa, iki cyiciro cya kabiri kikaba kireba inkingo miliyoni 55 zari zisigaye.
Riti “Muri izo nkingo zose, abafite ibyago byinshi byo kwandura nk’abakora mu nzego z’ubuzima bagomba gukingirwa mu ba mbere, hashingiwe kuri gahunda z’ikingira mu bihugu.”
Muri izo nkingo zose, 75% zatanzwe binyuze muri gahunda mpuzamahanga irimo gufasha ibihugu kubona inkingo za COVID-19, COVAX, naho 25% zihabwa igihugu byugarijwe n’ubwandu bwinshi.
Kuri iki cyiciro miliyoni 41 zashyizwe muri COVAX, miliyoni 14 zigenerwa ibihugu birimo ibyo muri Afurika nka Nigeria, Afurika y’Epfo, Kenya, Ghana, Cabo Verde, Misiri na Tunisia.
Mu nkingo zanyujijwe muri COVAX harimo miliyoni 14 zagenewe Amerika y’Epfo na Caraibe na miliyoni 16 zagenewe ibihugu byo muri Aziya birimo u Buhinde.
Ninaho habarizwa inkingo zigera kuri miliyoni 10 zagenewe Afurika, zikazagabanywa ibihugu bizatoranywa mu bufatanye n’Umuryango wa Afurika yunze Ubumwe.
Mu gusaranganya icyiciro cya mbere cyari kigizwe n’inkingo miliyoni 25 ku wa 3 Kamena, inkingo miliyoni 19 zanyujijwe muri COVAX.
Muri izo harimo izigera kuri miliyoni 5 zigenewe Afurika, na zo zigomba gusaranganywa ibihugu bizatoranywa mu bufatanye na AU.
Inkingo zisigaye zigera kuri miliyoni 6 zashyizwe mu cyiciro cy’ibihugu bifite ubwandu bwinshi byatoranyijwe, birimo na Misiri.
Ubutegetsi bwa Biden buheruka gutangaza ko buzagura izindi nkingo miliyoni 500 za Pfizer, zizahabwa ibihugu 92 bikennye, ibiri mu nzira y’amajyambere n’ibigize Afurika yunze Ubumwe.
Zose zizatangwa mbere ya Kamena 2022, harimo miliyoni 200 zigomba gutangwa mbere y’uko uyu mwaka wa 2021 urangira.
Ishami ry’Umuryango w’Abibumbye ryita ku buzima, WHO, rivuga ko kugira ngo COVID-19 ihagarikwe bihaye intego yo gufasha ibihugu gukingira nibura 10% by’abaturage bitarenze Nzeli, 40% mbere y’uko uyu mwaka wa 2021 urangira na 70% kugeza muri Kamena umwaka utaha.
Binyuze muri COVAX ibihugu 52 bya Afurika byatangiye gukingira COVID-19, nyamara ngo bimaze gutanga inkingo miliyoni 40 zonyine. Zihwanye na 2% by’abaturage bose ba Afurika.
Ni mu gihe nka Leta Zunze Ubumwe za Amerika imaze gukingira hejuru ya 65% by’abantu bakuru, bahawe urukingo rumwe cyangwa ebyiri.
Mu kugerageza kuziba icyo cyuho, ibihugu bya Afurika biri mu rugendo rwo kubaka ibigo bizaba bikorerwamo inkingo za COVID-19 mu Rwanda, Senegal na Afurika y’Epfo.
