Ubuyobozi bwa BPR Bank Plc bwemeza ko ibaruramari ryo mu mwaka wa 2023 ryagaragaje ko iyi Banki yinjije inyungu ya Miliyari Frw 37.9, aya akaba ari amafaranga yinjijwe mbere yo gukuramo imisoro.
Mu mwaka wa 2022 ho yari yinjije Miliyari Frw 32.2 bivuze ko hazamutseho izamuka rya 18%.
Kuri uyu wa Gatatu nibwo abayobozi b’iyi Banki batangarijemo uru rwunguko.
Inyungu ya BPR Bank Plc nyuma yo kwishyura imisoro yageze kuri miliyari 25.8 ivuye kuri miliyari Frw 22.2 Frw mu mwaka wa 2022.
Ni inyungu yazamutse ku kigero cya 16.2% .
Mu mwaka wa 2021 iyi Banki yari yarungutse miliyari Frw 17.1.
Iyi Banki ivuga ko mu myaka itatu ishize urwunguko rwayo rwazamutseho ijanisha rya 36%.
Umutungo rusange wa BPR Bank Plc wiyongereyeho ku ijanisha rya 15% ugera kuri miliyari Frw 860 Frw mu mwaka wa 2023, arimo miliyari Frw 589 yabikijwe n’abakiliya, na byo byazamutse ku ijanisha rya 33%.
Ku bijyanye n’inguzanyo izatanzwe mu mwaka wa 2023 zigera kuri miliyari Frw 573, bigaragaza izamuka rya 24% ugereranyije n’umwaka wabanje.
