Perezida wa Nigeria Muhammadu Buhari yategetse ingabo na Polisi kwambarira urugamba bakabohoza abana baherutse gushimutwa n’abarwanyi.
Itangazo ry’Ibiro bye rigira riti: “ Umukuru w’igihugu yategetse ingabo na Polisi kwambarira urugamba bakagaba igitero kigamije kubohoza abana baherutse gushimutwa n’abarwanyi.”
Umuvugizi we witwa Garba Shehu yirinze gutangaza umubare w’abana baherutse gushimutwa.
Abo bana bashimutiwe mu ishuri riri ahitwa Kagara muri imwe muri Leta zigize Nigeria yitwa Niger.
Bashimuswe ku wa Kabiri tariki 16, Gashyantare, 2021, ashimutwa n’umutwe bikekwa ko ukorana n’abagizi ba nabi, ukaba ushaka ingurane kugira ngo ubarekure.
Perezida Buhari w’imyaka 78 yatorewe kuyobora Nigeria muri 2015. Icyo gihe yari yiyamamaje asezeranya abaturage kuzaca intege abarwanyi bose bari bamaze igihe bateza umutekano mucye mu gihugu, ku isonga hari Boko Haram.
Abakurikiranira hafi ibibera muri kiriya gihugu bavuga ko Buhari atigeze aca intege bariya barwanyi.
N’ikimenyimenyi ni uko mu mezi abiri ashize, hari abarwanyi bashimuse abanyeshuri 300 ubwo bari ku ishuri riri ahitwa Katsina.
Bariya bana baje kurekurwa ariko barekurwa byasakuje cyane.
Hagati y’itariki 14 na 15, Mata, 2014 hari abandi bana b’abakobwa 276 bashimutiwe mu ishuri riri ahitwa Chibok mu Ntara ya Borno, muri Nigeria.
Boko Haram yigambye ririya shimutwa, isi irahaguruka irabyamagana ariko ntibyabuza ko hari abakobwa bakomeza gushimutwa, bamwe bagirwa abagore b’abarwanyi ba Boko Haram.
Hari bake muri bo barekuwe ariko abandi kugeza ubu nta makuru yabo azwi na benshi.
Ivomo: The Nation
