Kuri uyu wa Gatandatu taliki 02, Mata, 2022 abagizi ba nabi basanze abantu bacukuraga zahabu mu kirombe kiri ahitwa Namentenga barabarasa hapfa abagera kuri 20.

Ni mu kirombe kiri ahitwa Kougdiguin mu Majyaruguru ya Burkina Faso.

Umwe mu baturage b’aho yabwiye Reuters ati: “ Abantu bari kuri moto baje barasira abantu mu kirombe kiri ahitwa Kougdiguin.”

Kugeza ubu abantu 20 nibo babaruwe ko bahasize ubuzima ariko hari n’abandi benshi bakomeretse ndetse bamwe bashobora no kuza gutakaza ubuzima kubera ubukana bw’ibikoremere.

Ku rundi ruhande ariko hari amakuru avuga ko abapfuye ari 22.

Taliki 12, Werurwe, 2022 abandi bantu 11 nabo barasiwe mu kirombe barapfa.

Hari abandi 10 nabo baherutse kurasirwa mu kindi kirombe giherereye ku mupaka wa Burkina Faso na Niger nabo bahasiga ubuzima.

Abantu 80 bamaze kwicirwa mu bitero nka biriya mu gihe kitageze ku kwezi!

Abarwanyi bagendera ku mahame akarishye ya kisilamu nibo bashinjwa buriya bwicanyi.

Abayobozi ba gisirikare ba Burkina Faso bavuga ko hari gushyirwaho uburyo bw’ibiganiro hagati y’Abakuru b’Imiryango muri Burkina Faso ngo baganire n’abayobozi b’imitwe ivugwaho buriya bwicanyi.

Aba barwanyi kandi bamaze igihe barazengereje abaturage ba Mali na Niger.

Bivugwa ko kuva batangiza biriya bitero mu mwaka wa 2015, bamaze guhitana abantu 2000, abandi bagera kuri miliyoni 1.7 bamaze guhunga bava mu byabo.