Ni ubwa mbere mu Burundi abantu 40 banduriye icyorezo COVID-19 mu masaha 48. Iki cyorezo cyavuzwe bwa mbere mu Burundi muri Werurwe, 2020, hafi igihe kimwe n’icyo cyagereye mu Rwanda.
Byatumye hafatwa ingamba zirimo n’uko nta Murundi uzahabwa serivisi iyo ariyo yose atambaye agapfukamunwa.
Mu minsi mike ishize Minisiteri y’ubuzima mu Burundi yapimye abantu 284 isanga abagera kuri 40 baranduye kiriya cyorezo.
uBurundi bwari mu bihugu byo muri Afurika y’i Burasirazuba bufite abantu bake banduye kandi bakicwa na kiriya cyorezo cyayogoje amahanga.
Minisitiri w’ubuzima mu Burundi Bwana Thaddée Ndikumana yagize ati: “ Mu bantu 284 duherutse gupima twasanze 30 baranduye baza biyongera ku bandi 10 bari banduye mu masaha 24 yari ashize. Ni umubare munini mu gihe cy’iminsi ibiri.”
Perezida w’u Burundi Evariste Ndayishimiye aherutse kuburira abaturage be ko uzica amabwiriza yo kwirinda COVID-19 azabihanirwa.
Yagize ati: “ Hari raporo zitugeraho zivuga ko hari bamwe mu bayobozi bica nkana amabwirizwa[amabwiriza] yo kwirinda COVID-19. Uwo ariwe wese tuzasanga ayica tuzamufata nk’umugizi wa nabi agezwe imbere y’amategeko.”
Mu mezi make yakurikiye umuntu wa mbere wagaragayeho ubwandu bwa COVID-19, u Burundi bwanenzwe kudashyiraho amabwiriza akomeye yo kurinda abaturage kuyandura.
Kiriya cyorezo cyageze mu Burundi mu gihe igihugu kiteguraga kujya mu matora y’Umukuru w’Igihugu.
Kubera inyungu za Politiki, byabaye ngombwa ko ubutegetsi bwirinda kwereka abaturage ubukana bwacyo, ahubwo burareka amatora araba ararangira atsindwa na Gen Evariste Ndayishimiye.
Nyuma y’uko atsinze amatora, Perezida Ndayishimiye ari gufata ibyemezo bamwe bavuga ko bigaragaza impinduka nziza mu miyoborere y’u Burundi.
Uwo yasimbuye yapfuye nyuma gato y’amatora, habura iminsi mike ngo Perezida watowe arahire.
