Abarokotse Jenoside yakorewe Abatutsi bibumbiye mu muryango bise Humura kuri iki Cyumweru taliki 25, Kamena 2023 bazajya kunamira imibiri 917 y’Abatutsi batembanywe n’Akagera kakabata muri Tanzania.

Me Jean Bosco Nubumwe uyobora Umuryango Humura yabwiye Taarifa ko we na bagenzi be bagera kuri 40 ari bari buzindukire muri District ya Ngara mu Ntara ya Kagera muri Tanzania ahari ruriya rwibutso.

Nubumwe avuga ko basanze ari ngombwa ko bagura ibikorwa byabo byo kwibuka Abatutsi batembanywe n’imigezi imibiri yabo ikarenga imbibi z’u Rwanda, bikava muri Uganda aho bisanzwe bikorerwa, bigakomereza no muri Tanzania.

Ati: “ Twari dusanzwe tujya kwibuka muri Uganda, abayobozi b’aho bakaza kudufasha kwibuka abacu, ariko turashaka ko guhera kuri iki Cyumweru tuzakomereza no muri Tanzania ahari imva y’abatembanywe n’Akagera kakabageza yo”.

Avuga ko muri kiriya gikorwa, bazifatanya n’abarokokeye Jenoside muri Kirehe y’ubu kuko ngo ari bo bafite ababo benshi batawe mu ruzi rw’Akagera.

Me Jean Bosco Nubumwe avuga ko mbere y’uko icyorezo COVID-19 cyaduka mu Rwanda, abagize Humura bari baratangiye gahunda yo kuzajya kwibukira muri Tanzania ariko ngo kiriya cyorezo kiza kuba kidobya.

Icyo basaba MINUBUMWE…

Umuyobozi w’Umuryango Humura; Me Nubumwe asaba inzego za Leta zirebwa no kwibuka ni ukuvuga MINUBUMWE ndetse na Minisiteri y’ububanyi n’amahanga gukorana n’ubuyobozi bwa Tanzania k’uburyo mu myaka itaha Tanzania yazajya ibibafashamo.

Avuga ko muri Uganda babyumva k’uburyo iyo habayeho kwibuka Abatutsi batembanywe n’amazi akabagezayo, Guverinoma yohereza uyihagarariye.

Ati: “ Turasaba Guverinoma yacu ko yaganira n’iya Tanzania mu myaka iri imbere bakajya badufasha mu gutegura iki gikorwa, bikagaragara ko nabo bakigize icyabo…”

Ashima ko muri Uganda iki gikorwa kigenda neza.