F.C Barcelona yirukanye Ronald Koeman nyuma y’amezi 14 ayitoza, ayisiga ku mwanya wa cyenda muri shampiyona y’umupira w’amaguru muri Espagne, La Liga.
Asezerewe nyuma yo gutsinda imikino ine gusa mu mikino 10 iheruka.
Umukino wakomye imbarutso ni uwabaye mu ijoro ryo kuri uyu wa Gatatu, warangiye Barcelona itsinzwe na Rayo Vallecano igitego 1-0, uba umukino wa kane iyi kipe itsinzwe muri itandatu iheruka mu marushanwa yose.
Rayo Vallecano yari itaratsinda Barcelona mu myaka 19 ishize.
Mu mwaka ushize Koeman yegukanye Copa del Rey. Gusa igenda rya Lionel Messi n’ibibazo by’ubukungu byatumye iyi kipe isinyisha gusa abakinnyi baziye ubuntu n’igenda rya Antoine Griezman, byayishegeshe kurushaho.
Barcelona yaherukaga gutsindwa na mukeba Real Madrid 2-1, ukaba n’umukino wa gatatu wikurikiranya wa El Clasico yari atsinzwe.
Nyuma yawo abafatana bitambitse imodoka ya Koeman baramutuka, bamusaba gusezera.
Koeman w’imyaka 58 wakiniye Barcelona imyaka itandatu, yagiye muri ako kazi muri Kanama 2020 asimbuye Quique Setien. Yashyizweho na Josep Maria Bartomeu wayoboraga iyi kipe, aza kwegura.
Hari amakuru ko ubuyobozi bushya burangajwe imbere na Joan Laporta bushobora kumusimbuza Xavi wakiniye iyi kipe igihe kirekire, ubu atoza Al Sadd yo muri Qatar.
Hatekerezwa kandi Marcelo Gallardo utoza River Plate yo muri Argentine na Roberto Martinez utoza ikipe y’igihugu y’u Bubiligi.
