Ishami ry’Umuryango w’Abibumbye ryita ku buzima (WHO) ryemeje COVAXIN nk’urukingo rushya rwa COVID-19, ruba urwa munani mu zirimo kwifashishwa mu guhangana n’iki cyorezo gikomeje guhitana benshi ku isi.

Uru rukingo rukorwa n’ikigo Bharat Biotech cyo mu Buhinde umuntu aruhabwa inshuro ebyiri, hagati y’urukingo n’urundi hakajyamo ibyumweru bine.

Ku ikubitiro ruzahabwa abantu bafite imyaka 18.

WHO yavuze ko mu igerageza basanze Covaxin irinda umuntu wanduye virus ya SARS-CoV-2 adashobora kuremba ku kigero cya 78%.  Ni ubwirinzi buboneka nyuma y’iminsi 14 kuzamura, uhereye igihe yaherewe urukingo rwa kabiri.

Ni urukingo kandi rubikwa ku bukonje bwo hasi, ku buryo kurubika byakorohera ibihugu bikennye bidafite firigo zikonjesha cyane nk’izikenerwa ku nkingo za Pfizer.

WHO yatangaje iti “Itsinda ry’abajyanama mu bya tekiniki ryakoranyijwe na WHO rigizwe n’inzobere mu bugenzuzi hirya no hino ku isi, ryemeje ko Covaxin yujuje ibisabwa na WHO mu kurinda COVID19, ko inyungu z’uru rukingo ziruta kure impungenge zishobora kurukomokaho, bityo rushobora gukoreshwa.”

Kugeza ubu imibare ijyanye n’uburyo uru rukingo rwamera ku bagore batwite ntabwo iraboneka, ku buryo inyigo zabyo ziteganywa mu gihe kiri imbere.

Inkingo zamaze kwemezwa za COVID-19 zirimo Comirnaty yakozwe na Pfizer na BioNTech, AstraZeneca, Janssen, Moderna, Sinovac na Sinopharm.