Abahanga bo muri Vietnam babonye ko muri kiriya gihugu hadutse ubundi bwoko bushya bwa COVID-19. Ni ubwoko buhuje ubwadutse mu Bwongereza no mu Buhinde.

Ni ibitangazwa na bimwe mu binyamakuru bya Leta  byo muri kiriya gihugu cyane cyane ibikorera mu Murwa mukuru Hanoi.

Kugeza ubu muri kiriya gihugu  hamaze kubarurwa abantu 6,700 banduye COVID-19 muri rusange, muri bo abagera kuri 46 bapfuye kandi abenshi muri bo banduye muri Mata, 2021.

Minisitiri w’ubuzima muri kiriya gihugu witwa  Nguyen Thanh Long niwe watangaje ibya buriya bwandu.

Bwana Nguyen Thanh Long yavuze ko buriya bwoko bushya bwa COVID-19 bwandura vuba kubera ko agakoko kayitera kiyongera cyane mu muyaga bigatuma yandura vuba.

Ikindi ni uko hirinzwe gutangazwa umubare w’abantu babaruye babasangana bwandu bushya.

Vietnam iri mu bihugu byashimirwaga uko byarinze ababituye kwandura kiriya cyorezo.

Bimwe mu bintu byagifashije ni uko abantu bagaragayeho buriya bwandu bashyizwe mu kato kandi bakakamaramo igihe kirekire.

Ikindi ni uko abantu babujijwe kwegerana aho baba bari hose.

Ubwoba bw’uko kiriya cyorezo cyakwica bensho, bwatumye  ubutegetsi bufata ingamba zikomeye zirimo no gufunga za restaurants, aho banywera ikawa, aho batunganyiriza imisatsi, aho bagororera ingingo n’ahandi.

Vietnam ituwe n’abaturage miliyoni 97, muri bo miliyoni imwe nibo bakingiwe

Reuters ivuga abategetsi ba Vietnam bari gukora uko bashoboye ngo igihugu kibone inkingo zihagije.

Muri iki gihe hari inkingo miliyoni ebyiri zibitswe zitegerejwe kuzaterwa abaturage.

Kiriya gihugu kibitse inkingo zo mu bwoko bwa Oxford/AstraZeneca.

Hari amakuru avuga ko hari izindi nkingo miliyoni 30  zo mu bwoko bwa vaccine Pfizer/BioNTech kiriya gihugu cyatumije.

Abategetsi b’iki gihugu kandi bari kuganira n’ab’u Burusiya ngo barebe niba bazabaha Sputnik V.

Vietnam iri no gukora uko ishoboye ngo ibe yakorera ku butaka bwayo inkingo za kiriya cyorezo.