Abakozi b’Ishami ry’Umuryango w’Abibumbye ryita ku buzima, OMS, bafatanyije n’abahanga bo muri Amerika bari kwiga imiterere y’ubwoko bushya bwa COVID-19 bumaze kugaragara muri Amerika, Israel no muri Denmark.
Ni ubwoko bise BA.2.86.
Ubu bwoko bwifitemo ubushobozi bwo kwanduza abantu benshi kandi vuba, ubwo bushobozi bukaba bushingiye kuri kimwe mu bigize iriya virusi(protein) kitwa Spike.
Mu nyandiko OMS yaraye isohoye ivuga kuri ubu bwandu; handitsemo ko ahantu iriya virusi imaze kugera ari muri Israel, Denmark no muri Amerika.
Ya Protein yitwa Spike niyo iha imbaraga iriya virusi kugira ngo ishobore kwinjira mu mubiri w’umuntu imumunge.
Ishami ry’Umuryango w’Abibumbye rishinzwe ubuzima rivuga ko abakozi baryo bari gukorana n’inzego z’ubuzima zo mu bihugu byagaragayemo buriya bwandu kugira ngo bahangane nabwo kandi bakumire ko bwakomereza no mu bandi batarandura.
Ku rukuta rwa X( yahoze ari Twitter) rwa OMS handitsweho ko ‘imiterere y’iriya virusi itaramenyekana neza’ ariko ko abahanga bari gukorana ngo bayimenye bityo batange inama zo kuyikumira.
Muri iki gihe, hari ubwoko butatu bwa COVID-19 buri gucungirwa hafi n’abahanga ba OMS.
Ubwo ni XBB.1.5, XBB.1.16 na EG.5.
OMS ivuga ko ikibabaje kugeza ubu ari uko ibihugu hafi ya byose ku isi byatereye iyo, byumva ko COVID-19 yarandutse burundu.
Ibi biha icyuho ubwandu bushya kandi ngo hari abantu buhitana ariko ntibabimenye cyangwa ngo babyiteho.
Abahanga bavuga ko niba isi idakangutse ngo yongere ifate COVID-19 nk’ikibazo kiyugarije, mu minsi iri imbere( ya vuba cyangwa ya kera), ibintu bishobora kuzasubira irudubi.
