Abajura bataramenyekana bibye ibikoresho byo muri Chapelle ya Tumba icungwa n’ababikira b’Abizeramariya.
Umubikira uyobora icyo kigo, Soeur Julienne Mukarwego yabwiye itangazamakuru ko abajura batwaye taberikanukuro n’isakaramentu rya Ukarisitiya hamwe n’igikoresho bakoresha bashengerera kitwa austentoire mu Gifaransa.
Avuga ko iyo taberikanukuro yibwe n’abajura baturutse hanze y’Ikigo mu ijoro ryo ku wa Kabiri tariki 28, Ugushyingo 2023 .
Ibi byibwe muri Chappelle y’Ikigo cyita ku basheshe akanguhe gicungwa n’ababikira b’Abizeramariya.
Padiri Mukuru wa Paruwasi Cathedrale ya Butare, Pierre Celéstin Rwirangira yabwiye Kigali Today ko ibyabaye ‘biteye isoni’.
Sr Mukarwego avuga ko iyo taberikanukuro ikozwe mu giti idahenze cyane nka austentoire aka kakaba ari agakoresho gakozwe mu cyuma n’ibirahure gashyirwamo Yezu igihe bashengereye, bamurangamiye.
