Mu gitondo kuri uyu wa mbere muri Aziya ahari isoko rinini rya zahabu, igiciro cy’iri buye ry’agaciro cyazamutseho hafi 1.8% igera kuri hafi $4,408 ni ukuvuga hafi miliyoni esheshatu n’igice (Frw 6,430,034) y’amanyarwanda ku kilo.

Ibuye ry’agaciro bita ifeza ryo ryazamutseho hafi 3.5%, kuko amafaranga yimuriwe mu byitwa “ibikoresho byizewe” (safe-haven assets), bivuze ko abacuruzi b’ayo mabuye y’agaciro basanga ibyabaye muri Venezuela bishobora gutuma ubucuruzi mpuzamahanga bujegera mu rugero runaka.

N’ikimenyimenyi ku isoko ry’imigabane naho ntibyakomeje uko byari kuko imigabane yazamutse ubirebye mu buryo bwa rusange.

Igihe zahabu yigeze kuzamuka mu giciro kurusha ikindi gihe mu mateka hari mu mwaka wa 1979, ubwo cyageraga kuri 60% .

Muri rusange, impamvu ziteza zahabu kuzamuka harimo ibyitezwe byo kugabanya inyungu ku nguzanyo, kwigarurirwa kwa zahabu n’amabanki makuru, n’impungenge z’abashoramari ku makimbirane mpuzamahanga no kutabona neza ahazaza h’ubukungu.

BBC ivuga ko n’ibiciro by’ibikomoka kuri petelori byahungabanye mu rukerera rwo kuri uyu wa Mberet ariki 05, Mutarama, 2026, ariko biza gusubira ku murongo uko amasaha yakuraga.

Abashoramari muri rusange bavuga ko bahangayikishijwe n’imiterere y’ubukungu cyane cyane ku isoko ry’ibikomoka kuri petelori nyuma y’igitero Amerika yagabye kuri Venezuela igashimuta Perezida wayo.

Perezida wayo Donald Trump yatangaje ko azakoresha umutungo munini wa Peteroli wa Venezuela nyuma yo gufata Maduro akemeza ko bizakorwa binyuze mu gikorwa cy’uko Amerika izayobora igihugu kugeza igihe hazaboneka inzibacyuho “itekanye, iboneye kandi itekerejweho neza”.

Abasomyi bamenye ko kugeza ubu Venezuela ari cyo gihugu cya mbere ku isi kibitse petelori nyinshi kurusha ibindi kuko ibyari biyifite ubu yagabanutse kubera kuyicukura umusubizo.

Nubwo ari uko bimeze, umusaruro yagezaga ku isoko ni mucye cyane kubera ko Amerika imaze igihe yarayishyize mu kato.

Kugeza ubu iki gihugu cyatangaga 1% gusa bya peteroki yose icuruzwa ku rwego rw’isi.