Minisiteri y’Ubuzima yagaragaje ko abantu barembye kubera icyorezo cya COVID-19 bongeye kuzamuka, aho kuri uyu wa Mbere bageze ku bantu 20 mu gihe icyumweru gishize cyatangiye harembye abantu batandatu.

Ni ikibazo kijyanye n’uburyo muri iyi minsi abantu bandura basigaye baruta abakira nubwo imibare yabo idakanganye nko mu byumweru bishize.

Kuri uyu wa Mbere abakirwaye bageze ku 1480 mu gihe mu minsi icyenda ishize – ku wa 28 Gashyantare – bari 821 ari na wo mubare muto uheruka.

Imibare y’abarembye yazamutse cyane kuri uyu wa Mbere bagera kuri 20 mu gihe ku Cyumweru bari 12. Ni ukuvuga ko hiyongereyeho abantu umunani mu munsi umwe.

- Kwmamaza -

Ku wa Gatandatu, ku wa Gatanu no ku wa Kane w’icyumweru gishize abarembye bari 11, ku wa Gatatu bari icyenda, ku wa Kabiri bari umunani mu gihe ku wa Mbere w’icyumweru gishize bari batandatu.

Minisiteri y’ubuzima isobanura ko uko umubare w’abarembye wiyongera, ariko n’ibyago by’uko hari abashobora gupfa biba byinshi.

Imibare igaragaza ko nubwo hafatwa ibipimo bike bya COVID-19 hakabonekamo abarwayi batari benshi cyane, ubwandu buhari kuko ijanisha ku bandura ryabaye 4.3% kuri uyu wa Mbere. Hafashwe ibipimo 2.483 habonekamo abarwayi 100.

Ku Cyumweru ijanisha ku bandura ryari 1.5%, ku wa Gatandatu ryari 1.6% naho ku wa Gatanu ryari 2%.

Muri rusange abamaze gusangwamo COVID-19 mu Rwanda ni abantu 19.659, abakize ni 17.911 naho abamaze gupfa ni 268.

Kugeza ubu amaso yerekejwe ku bikorwa byo gutanga inkingo za COVID-19 nk’uburyo bwonyine bwo guhagarika icyorezo bushoboka kugeza magingo aya.

Mu minsi itatu ishize hamaze gukingirwa abaturarwanda 208.677. Intego ni ugukingira miliyoni 7.8 kugeza mu mpera z’umwaka wa 2022.