Menu
Indimi
Advert

Ubutabera

Inyubako Ya Rwigara Igiye Gutezwa Cyamunara

Yanditswe kuwa

Urukiko rw’Ubucuruzi rwatesheje agaciro ikirego cy’uruganda Premier Tobacco Company Ltd rw’umuryango wa Assinapol Rwigara, warusabaga gutambamira cyamunara ya hoteli yabo igiye gukurishwa ngo hishyurwe umwenda bafitiye banki.

Uwo mutungo ni igorofa igeretse kane itaruzura, iherereye mu mudugudu w’Ishema, Akagari ka Kiyovu mu Murenge wa Nyarugenge. Igiye kugurishwa ku cyemezo cy’Umwanditsi Mukuru mu rwego rw’Iterambere (RDB) cyo ku wa 20 Kanama 2021.

Mu iburanisha ryabaye kuri uyu wa Kane, Umunyamategeko Henry Pierre Munyangabe wunganira Cogebanque yasabye urukiko gutesha agaciro ikirego cy’umuryango wa Rwigara, kubera ko cyatanzwe hirengagijwe itegeko.

Ingingo ya 260 y’Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ryo mu 2018, iteganya ko “Guhagarika no gutesha agaciro cyamunara ku mitungo igurishwa hashingiwe ku cyemezo cyo kugurisha ingwate cyatanzwe n’Umwanditsi Mukuru, bisabwa Umwanditsi Mukuru.”

Umwanditsi Mukuru atanga igisubizo mu gihe kitarenze iminsi itatu y’akazi, haba hari utishimiye igisubizo cy’Umwanditsi Mukuru cyangwa udahawe igisubizo mu gihe giteganywa, akabitangira ikirego mu rukiko rw’ubucuruzi mu gihe kitarenze iminsi itanu y’akazi, uhereye igihe yamenyeye icyo gisubizo.

Munyangabe yavugaga ko iyo ngingo itubahirijwe, bityo ikirego kidakwiye kwakirwa.

Gusa umunyamategeko Janvier Rwagatare wunganira uruganda Premier Tobacco Company yabwiye umucamanza ko bandikiye Umwanditsi mukuru ku itariki 3 Nzeri, atinda gusubiza bityo bahitamo gutanga ikirego cyihuse.

Umucamanza yaje kuvuga ko atabona muri dosiye niba bariyambaje Umwanditsi mukuru ngo abe yabishingiraho, bityo yanzura ko ikirego kidakwiye kwakirwa kubera ko cyatanzwe mu buryo bunyuranyije n’amategeko.

Umuryango wa Rwigara watangaje ko uzajuririra iki cyemezo mu Urukiko Rukuru rw’Ubucuruzi.

Hari amakuru ko umwenda ugomba kwishyurwa urenga miliyoni 500 Frw, mu gihe umutungo uzagurishwa wabariwe agaciro ka 1,081,983,000 Frw.

Uriya muryango wavugaga ko uheruka no kwakira ibaruwa wandikiwe na Cogebanque, iwumenyesha ko nta deni uwusigayemo, ndetse bayishyikirije urukiko kandi ngo nta yindi iyivuguruza bigeze babona.

Biteganywa ko nta gihindutse, imirimo ijyanye na cyamunara itangira kuri uyu wa Gatanu mu buryo bw’ikoranabuhanga, ikazagurishwa ku wa 24 Nzeri saa tanu.

Undi mutungo w’uyu muryango uheruka kugurishwa muri cyamunara ni itabi ry’uruganda Premier Tabaco Company, ryagurishijwe mu 2018 ngo hishyurwe imyenda y’ikigo cy’imisoro n’amahoro. Ryaguzwe miliyoni 512 Frw.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement
Advertisement Enter ad code here