Amakuru Taarifa ifite aravuga ko Perezida Paul Kagame yageze mu Murwa mukuru wa Azerbaijan witwa Baku ahari kubera inama mpuzamahanga ku bidukikikije yitwa COP 29.

Abantu barenga 40,000 barimo Abakuru b’ibihugu 100 bari mu bayitumiwemo.

Faustin Munyazikwiye uyoboye itsinda ry’abatekinisiye b’Abanyarwanda bari i Baku muri iyo nama avuga ko u Rwanda rwasangije amahanga aho rugeze rushyira mu bikorwa ibikubiye mu masezerano ya Paris  yo kurengera ibidukikikje yiswe Paris Agreement.
Ni ayo mu mwaka wa 2015.

Munyazikwiye avuga ko u Rwanda rwasangije amahanga imishinga rwashyize mu bikorwa yo kurengera ibidukikije irimo Green Gicumbi, Green Amayaga n’indi nk’iyo.

U Rwanda kandi rwabwiye abitabiriye COP 29 ko rumaze gukusanya miliyoni $200 zo kurufasha gushyira mu bikorwa imishinga rwiyemeje.

Ibiganiro Perezida Kagame yitabiriye, biratangira kuri uyu wa Kabiri taliki 12 bikazarangira kuri uyu wa Gatatu taliki 13, Ugushyingo, 2024.

Imwe mu ngingo zikomeye zizaganirirwa muri iyi nama ku rwego mpuzamahanga ni ukureba aho umuhigo wo gukusanya Miliyari $100 ugeze ushyirwa mu bikorwa.

Amahanga mu mwaka wa 2015 yari yariyemeje kuzakusanya ayo mafaranga kugira azafasha ibihugu gushyira mu bikorwa ingamba zo guhangana n’ingaruka zo gushyuha kw’ikirere.

Gushyuha kw’ikirere bigira ingaruka zirimo no guhindagurika kw’ibihe; nako kukagira ingaruka ku isi harimo kwaduka kw’ibiza nk’imvura nyinshi, inkubi zikomeye, ubutayu no gucika kw’ubwoko bumwe na bumwe bw’ibinyabuzima.

Nubwo amahanga yari yariyemeje ko ayo mafaranga agomba kuboneka kugira ngo afashe mu ishyirwa mu bikorwa by’iyo mishinga, ibihugu bikize ntibyigeze biyatanga nk’uko byari byarabyiyemeje.

Ni byo byatumye atinda kuboneka.

Perezida Paul Kagame azaganira n’abandi bayobozi bitabiriye iriya nama barimo na Perezida wa Azerbaijan witwa  Ilham Aliyev.