Mu ruzinduko ari mo muri Amerika ruzarangira ubwo azaba arangije kugeza ijambo ku bagize Inteko rusange y’Umuryango w’Abibumbye, Perezida Kagame yakiriwe ku meza n’abagize Umuryango witwa American Globol Strategies.
Uyu muryango washinzwe n’uwahoze ari Umujyanama mu by’umutekano muri Perezidansi y’Amerika witwa Robert O’Brien.
Yari umujyanama mu by’umutekano ubwo Amerika yayoborwaga na Donald Trump.
American Global Strategies ni ikigo cy’Abanyamerika gikorera i New York.
Abagize uyu muryango ni inararibonye mu mategeko mpuzamahanga, abahanga mu mateka n’imibanire y’ibihugu, bose bakaba bahuje intego yo kwigira hamwe uko ibintu ku isi byifashe.
Bacunga uko ibihugu bibanye, uko bigirana amasezerano mu bucuruzi[butandukanye], bakareba uko amakimbirane ya politiki akemurwa haba imbere mu bihugu runaka cyangwa hagati y’igihugu n’ikindi.
Abakorana n’iki kigo bagirwa inama y’uburyo bakwitwara mu bintu bitandukanye birimo ubucuruzi n’imari, umutekano mu kirere, mu mazi, ikoranabuhanga, urwego rw’ingufu ndetse n’ibyerekeye abikorera ku giti cyabo.
Undi wagize uruhare mu gushinga American Global Strategies ni uwahoze akora mu by’umutekano witwa Alex Gray.
Mu nama zitandukanye kandi, Perezida Kagame yahuye n’abandi bayobozi b’ibigo binini.
Abo barimo Albert Bourla uyobora ikigo Pfizer baganira uko imikoranire y’iki kigo n’u Rwanda yakongererwa imbaraga.
Undi bahuye ni Sultan Ahmed bin Sulayem uyobora ikigo kitwa DP World baganira uko iki kigo cyakwagura ishoramari ryacyo mu Rwanda, rikiyongera ku kigo Kigali Logistics Platform (KLP) gikora nka gasutamo iri imbere mu gihugu.
Perezida Paul Kagame kandi yahuye n’abandi bayobozi barimo uwa Zipline witwa Keller Rinaudo ndetse n’abagize Akanama Ngishwanama Ka Perezida wa Repubulika y’u Rwanda kitwa Presidential Advisory Council (PAC).
Umukuru w’u Rwanda azageza ijambo ku bitabiriye Inteko rusange y’Umuryango w’Abibumbye kuri uyu wa Gatatu taliki 20, Nzeri, 2023.
