Polisi y’u Rwanda yatangaje ko mu kugenzura iyubahirizwa ry’amabwiriza yo kurwanya COVID-19 mu turere dutatu tugize Umujyi wa Kigali, mu byumweru bitatu bishize hafunzwe utubari 73.

Ni imibare Polisi yatangaje ko ari iyo kuva tariki ya 13 Werurwe kugeza tariki ya 04 Mata.

Mu Karere ka Gasabo hari hamaze gufungwa utubari 55 twafatiwemo abantu 337, mu Karere ka Nyarugenge hafunzwe utubari 12, mu gihe mu Karere ka Kicukiro hamaze gufungwa utubari 06.

Mu butumwa yasohoye, Polisi yakomeje iti “ko ba nyiri utu tubari bafatwaga badufunguye bagacuruza inzoga nyamara binyuranyije n’amabwiriza yo kurwanya icyorezo cya COVID-19 kuko kugeza ubu utubari turakomeza gufunga.”

Mu bikorwa byo gukomeza gukurikirana iyubahirizwa ry’amabwiriza, kuri iki Cyumweru tariki 4 Mata Polisi yeretse itangazamakuru abantu 110 bafashwe barenze ku mabwiriza yo kwirinda no kurwanya Covid-19.

Muri aba bafashwe abagera kuri 60 bafashwe ku wa 03 Mata muri hoteli yitwa CENETRA iherereye i Kabuga Mu Murenge wa Rusororo mu Karere ka Gasabo.