Umuhanzi Kitoko wamamaye mu njyana ya Afrobeat mu Rwanda yageze i Kigali avuye mu Bwongereza aho yari amaze imyaka 12 atuye akaba ahavanye n’impamyabumenyi za Kaminuza muri Politiki.
Mu gitondo cyo kuri iki Cyumweru, tariki ya 9, Ugushyingo 2025 nibwo yageze i Kigali avuye mu Bwongereza aho yagiye Tariki 29, Werurwe, 2013 agiye kuminuza.
Akigera i Kigali, yagize ati:” Narinkumbuye abantu, mu by’ukuri narinkumbuye n’amafunguro ntabonaga mu mahanga.”
Yavuze ko yagarutse mu Rwanda kuko hari ubuzima, nubwo abantu benshi bumva ko hanze haruta mu Rwanda.
Ati: “ Tujya hanze gushaka ubumenyi kugira ngo tuze tubukoreshe hano.”
Avuga ko azajya asubira mu mahanga nk’abandi bose, ariko icyemezo cyo kugaruka mu Rwanda ari ntakuka.
Hagati aho ku wa 05, Ukuboza, 2025, Kitoko afite igitaramo azahuriramo na Davido, akemeza ko yiteguye kuzashimisha abantu.
Ati: “Nta bwoba mfite. Njye ku bwanjye ni ubwa mbere nzaba ninjiye muri BK Arena. Nta ndirimbo nshya nzaririmba, ariko nzatanga ibyishimo ndi umu old school kandi abantu bazishima”.
Mu Bwongereza, Kitoko ahakuye impamyabumenyi y’icyiciro cya kabiri cya kaminuza yavanye muri Kaminuza ya South Bank University mu bijyanye na Politike.
Yize kandi n’icyiciro cya gatatu cya Kaminuza (Master’s Degree) muri London Metropolitan University mu bijyanye no gukemura amakimbirane n’ububanyi n’amahanga.
