Abayobozi muri Minisiteri y’ubutasi bo muri Iran batangaje ko mu rucyerera rwo kuri uyu wa Kabiri tariki 27, Nyakanga, 2021 hari abagabo bakekwaho gukorera ubutasi bwa gisirikare bwa Israel, basatswe basanganywa imbunda nyinshi n’amasasu.

Iran ifite Minisiteri yihariye ishinzwe ibikorwa by’ubutasi haba imbere mu gihugu no hanze yacyo.

Itangazo ryayo rivuga ko bariya bagabo bafatiwe mu Burengerazuba bwa kiriya gihugu, bakaba biteguraga gutangiza imidugararo mu gihugu k’uburyo izahagurutsa abantu bakomeye baje kuyihosha bakaba barasirwamo.

Ikinyamakuru cyo muri Israel kitwa Haaretz kivuga ko amakuru gicyesha ikindi cyo muri Iran kitwa Mehr avuga ko umugambi wa bariya bakozi ba Mossad wari uwo guhindura Iran ahantu harangwa akaduruvayo.

Kugeza ubu ubutegetsi bw’i Yeruzalemu ntacyo buravuga kuri ibi.

Iran ivuga ko abanzi bayo barimo Amerika, Israel n’Arabie Saoudite bahora bashaka kuyibibamo akaduruvayo, ariko bagasanga abashinzwe gukumira ibintu nk’ibyo bari maso.

Aya makuru atangajwe nyuma y’ibyumweru bibiri mu Majyaruguru ya Iran hari imidugararo bivugwa ko yatewe n’ibura ry’amazi.

Ibyatangiye ari ibura ry’amazi nka nyirabayazana byahindutse ibibazo bya Politiki kandi bikwira ahandi mu gihugu.

Imiryango iharanira uburenganzira bwa muntu muri Iran ishinja Polisi kurasa no kwica abasivili.