Ikipe ya Milwaukee Bucks yegukanye igikombe cya shampiyona ya Basketball muri Leta zunze ubumwe za Amerika, nyuma y’imyaka 50 itagikozaho n’imitwe y’intoki. Yari imaze gutsinda Phoenix Suns amanota 105-98.
Ni umukino Giannis Antetokounmpo yatsinzemo amanota 50, warebwe n’abantu 20,000 n’abandi bagera mu 65,000 bari bakurikiraniye umukino hanze ya Fiserv Forum, inzu y’imikino yo mu mujyi wa Milwaukee, Leta ya Wisconsin.
Gutsinda umukino wabaye mu rukerera rwo kuri uyu wa Gatatu byatumye Milwaukee Bucks itwara igikombe ku mikino 4-2. Yagiherukaga mu 1971.
Yahise iba ikipe ya gatanu mu mateka ya NBA itwaye igikombe kandi yaratsinzwe imikino ibiri ibanza muri irindwi ya nyuma baba bagomba gukina.
Suns yatsinzwe mu gihe yifuzaga kwegukana igikombe cya mbere cya NBA nyuma y’imyaka 53, nyuma yo gutsindirwa nanone ku mikino ya nyuma mu 1976 na 1993.
Ntiyabashije guhagarika Antetokounmpo, wahise aba umukinnyi wa karindwi watsinze amanota agera muri 50 mu mukino wa nyuma wa NBA.
Antetokounmpo yahise aba umukinnyi w’umwaka wa shampiyona, umukinnyi wahize abandi mu bakinnye imikino ya nyuma n’umukinnyi wugariye neza kurusha abandi, urutonde yasanzeho Michael Jordan na Hakeem Olajuwon.
