Aristide Mugabe wari umaze imyaka irindwi akinira iyi kipe iri mu muzikomeye muri Basketaball y’u Rwanda yayisezeyeho. Yashimiye abamubaye hafi mu myaka amaze akinira iyi kipe.

Iby’uko yayivuyemo yabitangarije ku rukuta rwe rwa X.

Ni umwe mu bakinnyi b’abahanga  ba Basketaball u Rwanda rwagize.

Kuri X yanditse ati:  “Mbega urugendo! Ibikombe bitanu bya Shampiyona mu myaka irindwi idasanzwe ndi kumwe na Patriots. Byari byiza n’abavandimwe, abatoza, ubuyobozi n’abafana bacu. Byari iby’agaciro kuba muri uyu muryango mwiza nka Patriots.”

Yaboneyeho no gutangaza ko agiye mu yindi kipe yita Kepler BBC akayibera umukinnyi n’umutoza wungirije.

Azungiriza umutoza w’Umunya-Uganda, Mandy Juruni watwaye ibikombe bine bya Shampiyona ya Uganda ari kumwe na City Oilers.

Mugabe yakiniye Ikipe y’Igihugu imyaka 11, imyinshi muri yo ayimara ari Kapiteni.

Mu mwaka wa 2007 ni bwo yatangiye gukina mu cyiciro cya mbere ubwo yari muri Rusizi BBC yamazemo imyaka ibiri, mbere yo kwerekeza muri Espoir BBC.

Mu mwaka wa 2015 yakomereje muri Patriots BBC aho yubakiye izina rikomeye.

Muri rusange, Mugabe yegukanye Ibikombe bya Shampiyona umunani aba umukinnyi mwiza muri Shampiyona inshuro ebyiri (2012 na 2013).