Muhoozi Kainerugaba kuri X yanditse yifuriza Nyina Janet Museveni gukira vuba COVID-19 yamugaragayeho nyuma gato ya Noheli nk’uko byatangajwe na Perezida Museveni ubwe.
Muhoozi yanditse ati: “ Ndifuriza Mama Janet gukira vuba COVID-19. Imana ikomeze imuhe umugisha.”
Wishing Mama Janet a very, very quick recovery from Covid-19. God continue to bless her. pic.twitter.com/dgyFFKuxMB
— Muhoozi Kainerugaba (@mkainerugaba) December 28, 2023
Iby’uburwayi bwa Janet Museveni byatangajwe bwa mbere na Perezida Museveni abinyujije kuri X.
Yavuze ko Janet Museveni abaganga bamusanganye COVID-19 nyuma y’uko yumvise atamerewe neza.
Uko kutamererwa neza kwatangiye kuri Noheli ni ukuvuga taliki 25, Ukuboza, 2023.
Perezida Museveni yavuze ko ubwo umuryango we wari umaze gusangira ifunguro rya saa sita, Janet Museveni, yatangiye kumva akaratwa mu muhogo.
Bihutiye kumusuzuma COVID-19 ariko ntibagira iyo bamusangana.
Nyuma hafashwe ibindi bipimo byoherezwa ku bitaro i Mbarara, biza kugaragaza ko yanduye iriya ndwara.
Ku wa 26, Ukuboza, 2023, Janet Museveni yabyutse yacitse intege, yumva umutwe umurya akiri no gukaratwa mu muhogo.
Perezida Museveni avuga ko byaje kuba ngombwa ko umugore we ashyirwa mu kato mu yindi nzu iri ahitwa Rwakitura.
Museveni avuga ko nyuma yo gushyira umugore we mu kato, yakomeje gahunda yari yateguye kuri uwo munsi.
Perezida wa Uganda avuga ko igitangaje ari uko we ari mutaraga kandi bamaranye Icyumweru cyose basangira icyumba n’imodoka.
Ni ubwa mbere Janet Museveni arwaye COVID-19.
