Umugabo w’imyaka 40 y’amavuko witwa Ninganza Dieudonné bivugwa ko yari impunzi y’Umurundi y’i Mahama, yapfiriye mu Murenge wa Muhoza mu Karere ka Musanze. Bivugwa ko yari yasinze aza gushyamirana n’uwitwa Ishimwe, bararwana undi akubita umutwe muri kaburimbo biza kumuviramo urupfu.
Ninganza akomoka muri Province ya Makamba mu Burundi ahitwa Mubondo, aha ni mu Majyepfo y’u Burundi.
Amakuru Taarifa yakuye ahizewe, avuga ko uriya Murundi yari asanzwe ari umwarimu mu kigo kitwa Kingdom Nursery and Primary School ariko akaba yari ahamaze igihe gito.
Uwaduhaye amakuru yabisobanuye atya: “…Yari atashye avuye mu kabari ari kumwe na mugenzi we bageze mu muhanda bahura n’uwitwa Ishimwe nawe wari wasinze. Bateye amahane bararwana…”
Muri uko kurwana, Umurundi Ninganza yagushije umutwe muri kaburimbo, bikaba bikekwa ko ari byo byamukururiye urupfu.
Abarwanaga babonye abapolisi bari bari mu kazi ko gucunga umutekano, bariruka ariko uwo Ninganza Dieudonnée asigara aryamye.
Polisi niyo yamujyanye kwa muganga ku bitaro bya Ruhengeri, aza kugwa yo.
Umugore n’abana be baba mu nkambi y’impunzi z’Abarundi iba mu Murenge wa Mahama mu Karere ka Kirehe.
Ishimwe uvugwaho urugomo rwaviriyemo iriya mpunzi urupfu, yaracitse ubu ari gushakishwa n’ubugenzacyaha n’inzego zikorana nabwo.
