Ibiro bya Perezida w’u Bufaransa byatangaje ko Perezida Emmanuel Macron yanduye icyorezo cya COVID-19.

Ibiro bye,  Champs Elysée, byatangaje ko Perezida Emmuel Macron yapimwe kiriya cyorezo nyuma y’uko agaragaje bimwe mu bimenyetso byacyo.

Emmaneul Macron yahise yishyira mu kato, iwe akaba ari ho ari gukorera imirimo yo kuyobora igihugu.

Kariya kato yihaye akazakamaramo iminsi irindwi.

Perezida Emmanuel Macron afite imyaka 43 y’amavuko, umugore we witwa Brigitte Marie-Claude Macron afite imyaka 67 y’amavuko.

Abandi bayobozi b’ibihugu bikomeye banduye COVID-19 bakayikira ni Donald Trump wahoze ayobora USA, Minisitiri w’Intebe w’u Bwongereza Borris Johnson, Perezida wa Brazil Jair Bolsonaro n’abandi.

Ikinyamakuru Politico kivuga ko kwandura kwa Macron  bitumye asubika urugendo yari afite muri Liban hagati ya taliki 22 na 23, Ukuboza, 2020.

Ejo hashize , taliki 16, Ukuboza, 2020 yari yabonanye na Minisitiri w’Intebe wa Portugal witwa Antonio Costa.

Minisitiri w’Intebe wa Israel Benjamin Netanyahu yamwifurije kurwara ubukira.