Ni ubwa mbere Umukuru w’igihugu cyangwa undi mushyitsi uwo ari ari we wese wasuye urwibutso rwa Jenoside rwa Kigali yarushyizeho indabo apfukamye. Perezida wa Pologne abikora yari ari kumwe n’umugore we Agata Kornhauser-Duda .

Urwibutso rwa Kigali ruri ku Gisozi ruruhukiyemo imibiri 250,000 y’Abatutsi biciwe muri Komini zahoze zigize Umujyi wa Kigali mu mwaka wa 1994.

Mu ijambo yavuze ubwo yari ari kumwe na Perezida Kagame mbere y’uko baha ikiganiro abanyamakuru, Perezida Duda yavuze ko amateka ya Pologne nayo yuzuyemo agahinda katewe n’akaga abanzi bayo bayiteye.

Muri abo banzi harimo Abanazi ba Hitler biciye muri iki gihugu Abayahudi benshi mu Ntambara ya Kabiri y’Isi.

Avuga ko nyuma y’uko iki gihugu kibonye amahoro, ari ngombwa ko kiyabungabunga kandi ngo ibyo ni byo n’u Rwanda rugomba gukora kuko narwo rwaciye mu bihe bitarwohereye.