Minisiteri y’ubuzima muri Tanzania yemeje ko indwara iri kwica abaturage ari COVID-19. Ibiro bishinzwe kuvugira iyi Minisiteri bivuga byemeje ko ibimenyetso bihari byerekana ko muri kiriya gihugu hari COVID-19.
Ibi bitangajwe nyuma y’uko Ishami ry’Umuryango w’Abibumbye risabye Tanzania kuva ku izima, ikemera ko mu gihugu hari kiriya cyorezo.
Ubuyobozi bwa Tanzania buvuga ko n’ubwo COVID-19 yabonetse yo ariko itazashyira abantu muri Guma mu Rugo kandi ko ubukungu bwayo buzakomeza gukora.
Umuvugizi wa Minisiteri y’ubuzima witwa Gerard Chami yavuze ko abaturage batagombye gukuka umutima, ahubwo bagomba gukomeza akazi kabo nk’uko bisanzwe.
Yagize ati: “Nk’uko byavuzwe na Perezida wacu, igihugu kigomba gukomeza ubuzima, ubukungu bwacu bukazamuka kandi ntituzashyira abaturage muri Guma mu Rugo n’ubwo COVID-19 ihari.”
Leta yasabye abaturage gukomeza gushyira mu bikorwa ingamba zo kwirinda kiriya cyorezo, bakagira isuku, bakarya neza n’ibindi.
Nibwo bagiye gutangira kwambara agapfukamunwa…
Itangazo rya Minisiteri y’ubuzima rivuga ko imwe mu ngamba abaturage bagomba gushyira mu bikorwa harimo no kwambara agapfukamunwa.
Ni ubwa mbere kuva COVID-19 yaduka ku isi, Tanzania itegetse abaturage bayo kwambara agapfukamunwa.
Abaturage basabwe no kujya bakora imyitozo ngororamubiri kenshi, bagakoresha n’imiti ya gakondo mu kurwanya ibicurane n’izindi ndwara.
Mu gitondo cyo kuri Cyumweru tariki 21, Gashyantare, 2021 Perezida Magufuli yabwiye Abakirisitu bari baje mu Misa ko bagomba gushyira mu bikorwa inama bahabwa n’abaganga mu kwirinda CORONAVIRUS.
The Citizen
