Ubwo yaganiraga n’abaturage b’igihugu cye baba muri Sérbie, Perezida Félix Tshisekedi yavuze ko nubwo azitabira ubutumire bwa Amerika buzamuhuza na mugenzi we Paul Kagame ngo basinye ku nyandiko yemeza burundu ibyakorwa ngo amahoro mu Karere agaruke, hari ibyo atazemera gusinya nibiba biri muri ayo masezerano.
Ibyo ni ugushyira abarwanyi ba M23 mu ngabo ze hagakorwa igisirikare kimwe, ibyo mu Gifaransa bita ‘Brassage et Mixage’.
Tariki 28, Ugushyingo, 2025 ubwo yaganiraga n’abo baturage, Perezida Tshisekedi yagize ati: “ Nzajya i Washington gusinyana amasezerano n’u Rwanda k’ubuhuza bwa Leta zunze ubumwe z’Amerika kandi ibi ni ibintu byavuzwe kenshi bizwi neza. Icyakora ndagira ngo abantu bamenye iki kintu: ‘Ntabyo kuvanga ingabo n’abarwanyi bizabaho.”
Muri icyo kiganiro kandi, yababwiye ko nta ngingo ashobora gusinya igihe cyose yaba irimo ko hari ubutaka igihugu cye kizatakaza mu buryo ubwo ari bwo bwose.
Icyakora, avuga ko ibyerekeye imikoranire mu by’ubukungu hagati ya Kinshasa na Kigali abishyigikiye gusa akemeza ko bitashoboka mu gihe cyose hari umwuka mubi, ari naho ahera avuga ko gusinya ariya masezerano bikwiye.
Yavuze ko imwe mu nkingi zikomeye zayo masezerano ari uko ubusugire bwa DRC bugomba kubahirizwa, hakabamo ko ingabo z’u Rwanda ziri ku butaka bwe zitaha nyuma hakazaho kubaka ubwizerane hagati y’impande zombi.
Ibi Tshisekedi yabivuze hashize amasaha make mugenzi we uyobora u Rwanda, Paul Kagame ahaye abanyamakuru ikiganiro yavugiyemo ko kuba azahura na Tshisekedi bagasinyana ariya masezerano bikozwe k’ubuhuza bwa Amerika ari ibyo kwishimira.
Kagame yavuze ko n’ubwo ari uko bimeze, hari ubwo Perezida Tshisekedi yemera ibintu ariko bidateye kabiri akabihindura.
Perezida Kagame yabwiye itangazamakuru ryo mu Rwanda na mpuzamahanga ko n’ubwo Tshisekedi yahindura ibyo yemeye, ikiba gihari ari uko biba byasinyiwe k’umugaragaro.
Ibiro Ntaramakuru by’Abanyamerika, Associated Press, byatangaje ko Abakuru b’ibihugu byombi bazahura Tariki 04, Ukuboza, 2024.
