U Bushinwa bukomeje gukora amateka mu buryo bwo guhangana n’icyorezo cya COVID-19, aho bwarengeje miliyari 1 y’abaturage bamaze guhabwa urukingo.
Komisiyo y’igihugu ishizwe ubuzima (NHC) kuri iki Cyumweru yatangaje ko kugeza ku wa Gatandatu yari imaze gutanga inkingo 1,010,489,000. Ntabwo ariko iyo mibare igaragaza by’umwihariko abamaze guhabwa inkingo ebyiri ziteganywa ngo umuntu abe akingiwe byuzuye.
Izo nkingo zimaze gutangwa n’u Bushinwa zihwanye na 40% bya miliyari 2.5 z’inkingo zimaze gutangwa ku isi yose.
Ni intambwe ikomeye yatewe mu gihe mu ntangiro igikorwa cyo gukingira COVID-19 mu Bushinwa cyagendaga buhoro cyane. U Bushinwa bwujuje miliyoni ya mbere y’abakingiwe ku wa 27 Werurwe.
Xinhua yatangaje ko guhera muri Gicurasi ibintu byahindutse, ku buryo mu kwezi gushize hatanzwe inkingo zisaga miliyoni 500.
Yakomeje iti “Byafashe u Bushinwa iminsi 25 ngo buve kuri miliyoni 100 z’inkingo zatanzwe ngo bugere kuri miliyoni 200, iminsi 16 ngo buve kuri miliyoni 200 bugera kuri 300, n’iminsi itandatu ngo buve kuri miliyoni 800 bugere kuri miliyoni 900.”
NHC yavuze ko inkingo miliyoni 100 zujuje miliyari 1 zatanzwe mu minsi itanu.
U Bushinwa bwatangiye no gukingira abantu bafite munsi y’imyaka 18 hakoreshejwe inkingo zikorerwa imbere mu gihugu za Sinopharm na Sinovac.
U Bushinwa butuwe n’abantu basaga miliyari 1.4.
Bufite intego yo gukingira 40% by’abaturage bitarenze Nyakanga na 70% by’abari mu byago byinshi byo kwandura COVID-19 cyangwa kuzahazwa nayo, mbere y’uko uyu mwaka urangira.
