Polisi ikorera mu Ntara y’Amajyaruguru ku wa Gatandatu yafatiye umutoza wa Musanze FC mu birori ari kumwe n’abandi bantu 12 banyoye inzoga kandi batubahiriza amabwiriza yo kwirinda COVID-19. Kugeza ubwo twandikaga iyi nkuru yari agifungiye kuri station ya Polisi y’Umurenge wa Muhoza.
Umuvugizi wa Polisi mu Ntara y’Amajyaruguru Chief Inspector of Police(CIP) Alexis Rugigana yabwiye Taarifa ko Polisi yasanze Seninga ari kumwe n’abandi bantu mu rugo rw’umuturage bari kunywa irabafata.
Abajijwe impamvu Innocent Seninga ataciwe amande ngo arekurwe, CIP Rugigana yatubwiye ko agifunzwe kuko hari irindi perereza bakimukoraho.
Ati: “ Aracyafunzwe kuko hari irindi perereza tukimukoraho. Afungiye kuri Station ya Muhoza.”
Kwatambara neza agapfukamunwa, kunywera mu ngo… biracyatiza umurindi COVID-19
CIP Rugigana avuga ko muri rusange abatuye Musanze birinda COVID-19 ariko ko hakiri abantu bakigaragaraho imyitwarire yatiza umurindi ubwandu bwa COVID-19 harimo kutambara neza agapfukamunwa no kunywera mu ngo abantu ari benshi.
Ikindi ni uko abaturage batubahiriza ibwiriza ryo guhana intera ikwiye kandi yagenwe n’inzego z’ubuzima.
Yasabye abaturage gukomeza kuzirikana ko COVID-19 ihari kandi yica bityo bakayirinda.
