Zinedine Zidane wari umutoza mukuru wa Real Madrid yo muri Espagne yasezeye kuri uwo mwanya, nyuma yo gusoza umwaka w’imikino nta gikombe na kimwe.
Ni ubwa kabiri asezeye kuri uwo mwanya yanagiriyemo ibihe byiza, kuko kuva mu 2015 yatwaye ibikombe bibiri bya shampiyona na bitatu bya UEFA Champions League.
Zidane asezeye nyuma y’uko ikipe ye yabuze igikombe cya shampiyona ku munsi wa nyuma w’irushanwa, ubwo cyegukanwaga na Atletico Madrid yabarushaga amanota abiri. Muri UEFA Champions League ho yaviriyemo muri kimwe cya kairi, isezerewe na Chelsea.
Ni ubwa mbere isoje umwaka w’imikino nta gikombe na kimwe itwaye, ibintu byaherukaga mu myaka 11 ishize.
Itangazo ryasohowe na Real Madrid rivuga ko Zidane ari umwe mu batoza bakomeye yagize, ndetse ubuhangange bwe burenze ubwo abantu babonye mu kibuga nk’umukinnyi cyangwa nk’umutoza.
Rikomeza riti “Arabizi ko ahora ku mutima wa Real Madrid kandi ko Real Madrid ari kandi hazahora ari mu rugo rwe.”
Bikekwa ko ashobora kwerekeza mu ikipe ya Paris Saint Germain, agasimbura Mauricio Pochettino ushobora gusubira muri Tottenham yahoze atoza.
Byanavuzwe ko azatoza Juventus yanakiniye, ariko birashoboka ko Massimiliano Allegri ari we wasimbura Andrea Pirlo igihe yaba yirukanywe.
Zidane yabanje gutoza ikipe y’abato ya Real Madrid Castilla kuva muri Kamena 2014 kugeza muri Mutarama 2016, ubwo yahabwaga ikipe nkuru. Yayitoje kugeza ubwo yasezeraga muri Gicurasi 2018.
Yaje kongera kuyisubiramo muri Werurwe 2019 kugeza ubwo yasezeraga kuri uyu wa Kane.
Zidane w’imyaka 48 asezeye muri Real Madrid amaze kuyitoza imikino 114, yatsinzemo 68 bingana na 60%, anganya 26, atsindwa 20.
