Ikipe ya REG Women Basketball Club (REG WBBC) yegukanye igikombe cya Shampiyona y’u Rwanda ya Basketball mu bagore mu mwaka wa 2026, nyuma yo gutsinda The Hoops Rwanda imikino 4-0 mu mikino ya nyuma.
Mu mukino wa kane ari nawo wa nyuma mu ruhererekane rw’imikino ya nyuma, wabereye muri Petit Stade i Remera kuri uyu wa Gatatu, REG WBBC yatsinze The Hoops Rwanda amanota 73-46, ihita yemeza ko ari yo kipe yatwaye igikombe.
REG WBBC yagaragaje imbaraga kuva imikino ya nyuma yatangira, itsinda imikino ine yose yakinnye na The Hoops Rwanda, bityo ntiyagira umukino n’umwe itsindwa muri uru ruhererekane.
Ikipe ya REG WBBC yari isanzwe ifite igikombe cya Shampiyona giheruka, ndetse yari yarasoje imikino isanzwe ya shampiyona iri ku mwanya wa mbere.
Muri uyu mwaka, Shampiyona y’u Rwanda ya Basketball mu bagore yari yitabiriwe n’amakipe 11, arimo REG WBBC, APR WBBC, Kepler WBBC, The Hoops, GS Gahini, GS Marie-Rene, AZOMCO, UR Huye, UR Kigali, EAUR na IPRC-Huye.
REG WBBC imaze imyaka mike iri mu makipe akomeye cyane muri Basketball y’Abagore mu Rwanda.
Ikipe yashinzwe ishingiye ku cyahoze ari Ubumwe Women Basketball Club, nyuma iza guhinduka REG Women Basketball Club.
REG ivuga ko iyi kipe imaze gutwara ibikombe bya Shampiyona inshuro nyinshi, ikaba yaranagiye ihagararira u Rwanda mu marushanwa yo ku rwego rw’akarere no ku mugabane wa Afurika.
Mu mwaka wa 2025, REG WBBC na bwo yari yegukanye igikombe cya Shampiyona, itsinze Kepler WBBC mu mukino wa karindwi wa nyuma, bityo igikombe cya 2026 kikaba gikomeje umusaruro mwiza w’iyi kipe mu myaka ya vuba.
Ku rundi ruhande, The Hoops Rwanda yari yageze ku mukino wa nyuma nyuma yo gukora urugendo rwiza mu mikino ya kamarampaka.
Mu ntangiriro y’imikino yo gukuranwamo bita playoffs, The Hoops yari yatsinze Kepler WBBC amanota 65-55, ihita igaragaza ko ishobora guhatanira igikombe.
Gutsinda The Hoops Rwanda imikino 4-0 byahaye REG WBBC igikombe cya 2026 mu buryo bwigaragaza, mu gihe The Hoops yasoreje ku mwanya wa kabiri.
Iyi ntsinzi kandi ishimangira umwanya wa REG WBBC nk’imwe mu makipe akomeye kandi ahagaze neza muri Basketball y’a nobagore mu Rwanda, nyuma yo kongera kwegukana igikombe mu gihe yari isanzwe ari yo igifite.
